Ministrat e Jashtëm të NATO-s u takuan përsëri në ditën e dytë për të diskutuar mbi përgatitjet për samitin që do të mbahet më 24-26 qershor, për të forcuar lidhjen transatlantike dhe për ta bërë Aleancën një organizatë më të fortë, më parandaluese dhe ku përgjegjësia ndahet në mënyrë të drejtë.
Sekretari i Përgjithshëm i NATO-s, Mark Rutte në deklaratën e tij në hapjen e ditës së dytë të takimit që mblodhi ministrat e Jashtëm të vendeve aleate më 3-4 prill, tha se do të diskutohen përgatitjet për samitin e NATO-s që do të mbahet në Hagë të Holandës më 24-26 qershor.
Ai vuri në dukje se në seancë është e pranishme edhe Përfaqësuesja e Lartë e Bashkimit Evropian (BE) për Politikën e Jashtme dhe Sigurinë, Kaja Kallas. “BE-ja po rrit ndjeshëm përpjekjet e saj në mbrojtje dhe mendoj se ne të gjithë e mirëpresim këtë”, tha Rutte.
Në fjalën e tij duke e cilësuar si “një moment të rëndësishëm historik” Buletinin e Bardhë, hartën e re që BE-ja njoftoi më 20 mars për objektivat e vitit 2023 në mbrojtje, Rutte tha: “Tani presim me padurim bashkëpunim më të ngushtë në zbatimin e tij. BE-ja gjithashtu synon të luajë rol më të madh në mbështetjen e Ukrainës”.
Rutte tha se të gjithë aleatët duhet të ndajnë barrën në mënyrë të drejtë. “Angazhimi i vazhdueshëm i SHBA-së për aleancën tonë të fortë transatlantike mbetet gurthemeli i sigurisë sonë”, shtoi ai.
Sekretari i Përgjithshëm tha se në samitin e Hagës do të diskutohet forcimi i lidhjeve midis Evropës dhe Amerikës së Veriut duke e bërë NATO-n një aleancë më të fortë, ku barra ndahet në mënyrë më të barabartë dhe me parandalim më të lartë.
Në takimin që nisi dje merr pjesë për herë të parë Sekretari amerikan Shtetit, Marco Rubio.
Në deklaratën e tij në hyrje të takimit, Rubio dha mesazhin se aleatët evropianë duhet të shpenzojnë më shumë për mbrojtjen dhe të rrisin shkallën në 5 për qind të prodhimit të brendshëm bruto (PBB).
Türkiye përfaqësohet në takim nga ministri i Jashtëm, Hakan Fidan. Fidan ka zhvilluar dje takime dypalëshe me shumë nga homologët e tij, përfshirë Rubion.
