Vetëm 12 ditë nga arrestimi në Itali i biznesmenit, Marsel alias Bujar Shega, kompania “Viola Green” e pastrimit të mbeturinave që ai e administronte dhe e kontrollonte me 34 % të aksioneve, ka rënë në administrimin e një personi tjetër, që quhet Sherif Kapllani.
Sherif Kapllani, zotëron 33 për qind të aksioneve të kompanisë së pastrimit “Viola Green”.
Por 12 ditë pas arrestimit të administratorit Bujar Shega në Itali, aksionerët e tjerë kanë mbledhur asamblenë e ortakëve të kompanisë, duke vendosur shkarkimin e administratorit Bujar Shega dhe emërimin në vend të tij, të aksionerit Sherif Kapllani.
Vendimi është marë në 6 dhjetor 2024, ku dy aksionerët Sherif Kapllani dhe Fatos Jaupi që gëzojnë së bashku 66 për qind të aksioneve, kanë shkarkuar Shegën, i cili zotëron 34 për qind të aksioneve të kompanisë së pastrimit të mbeturinave, përmes përfitimit të tenderave publikë në disa kompani.
Njëherësh dy aksionerët kanë vendosur të ndryshojnë dhe adresën e zyrës qëndrore të kompanisë, duke u larguar nga zyra e katit Nr.13 në Qëndrën ETC dhe vendosur tek rruga “Gjikë Kuqali” në njësinë administrative Nr.5.
Kjo lëvizje dyshohet se është kryer për të shmangur një hetim pasuror të kësaj kompanie nga ana e prokurorisë së posaçme SPAK, e cila ka vënë në ndjekje penale Bujar Shegën për “Trafikim të narkotikëve në kuadër” të “Grupit të strukturuar kriminal” dhe “Pastrimit të produkteve të veprës penale”, vepra këto që SPAK pretendon se i ka kryer në bashkëpunim me Suel Çelën.
Kompania “Viola Green”, rezulton përfituese e dhjetëra tenderave publikë që kanë si objekt pastrimin nga mbeturinat të disa qyteteve.
Dy ditë më parë aksioneri kryesor i kësaj kompanie Bujar alias Marsel Shega, është esktraduar nga Italia.
Ndërsa ditën e djeshme Gjykata e Posaçme, ka vendosur të caktojë masën e sigurisë “arrest në burg”. Ndërsa pritet që brenda javës ai të meret në pyetje nga prokuroria./Ora News
