29-vjeçari shqiptar Isak Buna, i arrestuar në Londër, i ka shpëtuar ekstradimit drejt vendit @tonë. I riu shkaktoi terror me një pushkë të llojit AK-47, por i ka shpëtuar ekstradimit nga një vakum që ka gjetur në ligj në Britani.
Ai akuzohet se ka plagosur me një plumb rikoshet pasi qëlloi me armë zjarri në ajër gjatë një sherri. Sipas “The Sun”, ai i tha personit që kishte përballë: “Mos u shqetëso, tani do e marrësh vesh se kush jam unë. Do të të ***** ty dhe gjithë familjen tënde”.
Ngjarja ka ndodhur në vitin 2013 në Zenisht të Dibrës, ku u dënua për kërcënim dhe armëmbajtje pa leje. Ai u dënua me 5.4 vite burg por u arratis për në Londër.
Pas njoftimit se ishte në kërkim ndërkombëtar nga autoritetet shqiptare, Isak Buna u arrestua në janar nga policia e Britanisë së Madhe.
Por pas arrestimit, autoritetet shqiptare u bllokuan nga ekstradimi i tij pasi avokatët e tij në gjykatën e magjistraturës së Westminster argumentuan se tani ishte tepër vonë për ta ndjekur penalisht, duke përdorur boshllëkun ligjor.
Një zëdhënëse e Home Office tha: “Home Office ka punuar me Njësinë Kombëtare të Ekstradimit të Policisë Metropolitane për rastin e zotit Buna. Për shkak të ligjeve të parashkrimit në Shqipëri kërkesa për ekstradim u hoq.”
Home Office nuk e zbuloi nëse Buna ishte ende në proces kërkimi azili apo i ishte dhënë leje për të qëndruar.