Kolegji i Posaçëm i Apelimit, KPA shpalli të enjten më 3 prill vendimin për lënien në fuqi të shkarkimit nga detyra të prokurores së Elbasanit, Elveta Stafa Mura. Vendimi u mor në mënyrë unanime nga trupi gjykues i kryesuar nga Natasha Mulaj, me relatore Rezarta Schuetz dhe anëtare Albana Shtylla, Ina Rama e Mimoza Tasi, pas shqyrtimit në dhomë këshillimi të ankimit të Stafës. Vendimi i KPA është përfundimtar dhe me efekt të menjëhershëm.
Ish-prokurorja Elveta Stafa Mura u shkarkua nga Komisioni i Pavarur i Kualifikimit më 23 maj 2022, për probleme të pasurisë, kriterin e vetëm për të cilin u krye procesi i vetingut ndaj saj. Po ashtu, u konkludua se kishte cënuar besimin e publikut me deklarime kontradiktore e të rreme.
Stafa e filloi karrierën në sistemin e drejtësisë në vitin 1985. Ajo punoi prej më shumë se tre dekadash si prokurore në Prokurorinë e Rrethit Gjyqësor Elbasan.