Ditën e sotme pritet që Presidenti i Shteteve të Bashkuara të Amerikës, Donald Trump, të miratojë tarifat për të gjitha importet në SHBA. Ai do të dalë në Kopshtin e Trëndafilave të Shtëpisë së Bardhë, për të bërë të ditur të gjithëve se çfarë tarifash do të aplikohen.
Edhe pse Trump është shprehur se do shpallë tarifa “reciproke”, vendet e Bashkimit Evropian po ndjejnë presionin që u ushtrohet teksa kalojnë orët për të marrë vesh se si do vijojë ekonomia e vendeve të tyre.
Në një analizë, BBC shkruan se pavarësisht që Trump shpreh bindjen për tarifa reciproke dhe sjellje “më të këndshme” të SHBA ndaj partnerëve tregtarë, nuk përjashtohet vendosja e tarifave në shkall të gjerë prej 10%-20%.
Një tarifë universale prej 20%, ose ekuivalenti i saj, do të jetë një goditje për sistemin tregtar global siç raporton BBC.
Pati disa reagime nga evropianët në lidhje me këto tarifa.
Presidentja e Komisionit Evropian, Ursula von der Leyen, shprehu dëshirën për negociata, në mënyrë që të mbrohen të drejtat dhe interest e konsumatorëve, teksa nuk kurseu paralajmërimin për “hakmarrje” në rast se nuk ka negociata.
“Objektivi ynë është një zgjidhje nga negociatat. Ne nuk duam të hakmerremi. Nëse është e nevojshme, ne kemi një plan të fortë për t’u hakmarrë dhe do ta përdorim atë”, u shpreh ajo në seancën parlamentare evropiane.
Nga ana tjetër, reagim ka pasur dhe nga kryeministri i Britanisë së Madhe, Keir Starmer, i cili është gatshëm të ulë taksat për kompanitë e mëdha amerikane të teknologjisë, në këmbim që të ketë tarifa të ulëta nga Presidenti i SHBA-ve, Donald Trump.
Pavarësisht këtyre, mbetet për t’u parë se çfarë tarifash do të aplikojë administrata amerikane e Donald Trump, e sa do e ashpërsojnë apo jo ekonominë evropiane.
