Në zemër të qytetit të Rrëshenit, bashkia Mirditë, ndodhet një pallati 9 katësh që duhet të kishte përfunduar në vitin 2014, por ende sot vijon të jetë i papërfunduar dhe tepër i rrezikshëm për banorët.
Aktualisht pallati banohet vetëm nga 8 familje, nga 35 hyrjet e shituara. Disa nga qytetarët që kanë guxuar të hyjnë në pallat, kanë investuar shumë deri te kanalizimet, por hapësirat e përbashkëta janë skandaloze, si ashensorët e munguar, që janë kthyer në rrezik për jetën.
Drejtoresha juridike në bashkinë Mirditë, Manjola Doda, thotë se pas miratimit të planit zhvillimor në 2016-ën, ku është përcaktuar që ndërtimet do të jenë 5 kate dhe vendimit të 2024-ës, bashkia për 24 muaj nuk mund të ndërhyjë, pasi kjo e drejtë i njihet vetëm investitorit.
Nëse gjatë këtij afati, investitori nuk bën shtyrjen e afatit të punimeve dhe të investojë, bashkisë i lind e drejta ta konfiskojë objektin.
“Jemi të njohur me këtë situatë dhe këtë problematikë, por Bashkia Mirditë që nga viti 2016, që është miratuar plani i përgjithshëm vendor nga Këshilli Kombëtar i Territorit, ku pjesë e planit janë që ndërtimet, nuk lejohen më shumë se 5 kate. Bashkia e ka të pamundur pjesën e ndërhyrjes për përfundimin e kësaj procedure. Me vendimin që ka dalë në Nëntor të vitit 2024, nuk mund të veprojmë, sepse të drejtën për të aplikuar e ka vetëm drejtuesi, zhvilluesi, për të aplikuar, për vazhdimin e këtij procesi. Nëse ai nuk vepron dhe për 2 vite atëherë i lind e drejta Bashkisë së Mirditës për konfiskim e këtij pallati dhe për vazhdimin e procedurave. Për aq kohë sa plani është i përcaktuar atëherë jemi të detyruar që të zbatojmë afatin”, tha Doda.
Administratori i “Vaklera al shpk”, Dod Gjinaj, tha se arsyet që e kanë penguar në përfundimin e këtij pallati janë konflikti me kishën, mosdorëzimi i truallit nga pronarët, që e kanë penguar atë të marrë kredi, për të përfunduar objektin.
“Unë e kam lënë për disa arsye. Kam pasur probleme me kishën. Objektin e bëra me certifikatë provizore të karabinasë. Kur shkova tek banka më thanë që përsëri nuk ta ka liruar banka, e ka pronari i bankës. Edhe sot e kësaj dite në certifikatat provizore më del si pronar i truallit emri i filanit. Problemi ka qenë vetëm pronari i truallit, edhe sot e kësaj dite nuk ma liron. Vetëm pengesa, shkoj në bashki më thonë që nuk dimë gjë, shkoj tek ministria nuk më kthejnë përgjigje”, tha Dod Gjinaj./tvklan
