Mëngjesin e kësaj të marte është arrestuar në Maqedoninë e Veriut, Angel Samarakov, një prej pjesëtarëve të sigurimit të kryeministrit, Hristijan Mickoski.
Ish-punonjësi i Ministrisë së Brenshme maqedonase është kapur duke u dhënë informacione konfidenciale disa personave në lagjen e Shkupit, “Grcec”, e cila njihet për praninë e grupeve të krimit të organizuar. Informacioni u konfirmua nga Ministria e Brendshme pasi disa media vendase filluan që të spekulonin.
Mediat vendase raportojnë se Angel Samarakov është kapur në flagrancë duke u dhënë informacione konfidenciale disa personave që ende nuk janë identifikuar. Po ashtu, nuk dihet se çfarë informacioni u ka dhënë dhe nëse ka lidhje me kreun e qeverisë.
Kjo nuk është hera e parë që një pjesëtar i sigurimit të Mickoskit përfshihet në një incident të rëndë. Vetëm pak muaj më parë, shefi i sigurimit të tij, Ivica B., ka sulmuar fizikisht një koleg polic, i cili ishte në detyrë.
E gjitha ndodhi kur Policia u fut për kontroll në një lokal të njohur të Shkupit, që dyshohet se ishte bazë për trafikun e drogës. Ivica B., i cili ishte i pranishëm në lokal, tentoi të prishte aksionin dhe sulmoi kolegun.
