Vendi ynë, në një periudhë të shkurtër kohore, është prekur në disa skandale që kanë të bëjnë me ushqimet, duke nisur nga mandarinat me pesticide, të cilat u konstatuan në Kroaci, por u kthyen sërish mbrapasht dhe u hodhën në tregun shqiptar, apo edhe ai i pak ditëve më parë ku tonelata me fileto pule me salmonelë nga Brazili u hodhën në treg.
Por, pavarësisht skandalave, deri më tani, asnjë prej zyrtarëve të lartë nuk ka mbajtur përgjegjësi, pavarësisht se qytetarët shqiptarë vazhdojnë të helmohen me ushqimet që konsumojnë.
Ministrja e Bujqësisë, Anila Dena, e ftuar mbrëmjen e djeshme në emisionin “Të Paekspozuarit”, njoftoi se Autoriteti Kombëtar i Ushqimit (AKU) dhe se të gjitha inspektoriatet do të krijojnë një institucion që do të zbatojë politikat e tij, për peshkimin, për bimët, produktet e kafshëve dhe nuk do të varen nga një Drejtor i Përgjithshëm.
Denaj, siç duket, kërkon shmangien e përgjegjësisë, dhe të krijojë perceptimin se fajin e ka mënyra se si është ndërtuar institucioni, dhe jo emërimet politike, korrupsioni apo neglizhenca.
“Në shtator të vitit të kaluar ka kaluar një ligj që do të vihet në zbatim deri në fund të vitit, me të gjitha aktet juridike që inspektoriatet do të riorganizohen, AKU do të shkrihet dhe do të bashkohet me të gjitha inspektoriatet e ushqimit. Të gjitha do të krijojnë një institucion që do të zbatojë politikat e tij, për peshkimin, për bimët, produktet e kafshëve dhe nuk do të varen nga një drejtor i përgjithshëm, as nga ministri, por nga një sistem i tërë, sepse nuk mund të menaxhojmë vetëm me njerëz, por nga tre nivele monitorimi”, tha Denaj.
