Nga Boldnews.al
E hëna e kësaj jave duket se ka nisur ters për kryetarin e Bashkisë së Vlorës, Ermal Dredha. Ai dhe stafi i tij janë munduar maksimalisht që të krijojnë dekorin e takimeve propagandistike 3-ditorë të kryeministrit Edi Rama.
Në fillim, u sajua një takim me anëtarë “të sajuar” të forumit rinor të Partisë Demokratike” në Vlorë, ku Rama pranoi me qesëndi se arritjet e qeverisë së tij kishin bindur edhe të rinjtë opozitarë që t’i bashkoheshin Partisë Socialiste.
Më tej, foli për zgjatimin e “Lungomares”, një projekt që ka nisur prej gati një dekade dhe ende nuk po i duket fundit.
Këtë të hënë, Rama e nisi ditën me takime “me popullin”, ku do të fliste për akset e reja rrugore që do të lidhin Vlorën me zonën bregdetare përtej Qafës së Llogarasë.
Por, prezantimi i këtyre projekteve madhështore u prish nga era e rëndë dhe tymi toksik që pushtoi të gjithë qytetin, nga zjarret që përfshinë fushën e vjetër të mbetjeve të qytetit.
Era e rëndë, padyshim, duhet të ketë prekur edhe shqisat e kryeministrit Edi Rama. Dhe, nuhatja e tij është pikërisht halli më i madh i kryebashkiakut Ermal Dredha.
Ky i fundit i ka premtuar shpesh Ramës se gangrena e plehrave do të mbyllet “së shpejti”. E megjithatë, zgjidhja nuk ka mbërritur ende.
Natyrisht, për faj jo edhe aq të Dredhës, se sa të qeverisë së Ramës.
Landfilli i vjetër i Vlorës do të duhej të mbyllej vite më parë, kur qeveria miratoi dhe tenderoi projektin për ndërtimin e fushës së re të mbetjeve, në zonën e Sherishtës. Një projekt, që si shumë të ngjashme, nuk ka mbaruar dhe ende nuk dihet kur do të vihet në funksionim.
Nga mbrëmja e së dielës (23 mars 2025), fusha e mbetjeve në qytetin jugor u përfshi nga flakët, për të disatën herë gjatë dy-tre viteve të fundit.
Autoritetet lokale, në çdo rast, kanë premtuar zgjidhje të shpejtë, megjithëse në çdo rast kanë dështuar me sukses.
Kryebashkiaku i Vlorës, Ermal Dredha, premtoi sërish këtë të hënë se zjarret do të fiken dhe, brenda fundjavës, do të bëhet funksional landfilli i ri i Sheristës.
Projekti për ndërtimin e fushës s re të mbetjeve urbane është tenderuar në vitin 2020. Vlera e projektit është mbi 10 milionë euro dhe financimi është realizuar me një kredi nga banka gjermane KFV.
Deri më tani, qeveria ka refuzuar të bëjë transparencë mbi institucionin që ka kryer tenderin, e fituar nga bashkimi i operatorëve “Integrated Technology Service” e biznesmenit në kërkim, Klodian Zoto, dhe kompanisë italiane “Bulfaro”.
Landfilli i Sheristës ishte parashikuar që të përfundonte fillimisht në dhjetor 2021, më pas afati u shty në fund të vitit 2023 dhe, ndërkohë, kryebashkiaku Dredha dha premtimin e radhës për fundin e marsit 2025.
Në vjeshtën e vitit 2023, kryeministri Rama, gjatë një vizite në Himarë, i kërkoi Dredhës që projekti i Sherishtës të përfundonte në pranverën e vitit 2024.
Dredha duhet të ketë pasur ndonjë hall të madh, i cili e ka detyruar t’i dredhojë kërkesës së shefit të tij politik.
Por, edhe kryebashkiaku i Vlorës, si një “rilindas” i vërtetë, nuk guxon t’i thotë Ramës se përgjegjësia për zvarritjen e përfundimit të projektit duhet të kërkohet tek qeveria, tek fondet dhe projektet e miratuara nga Këshilli i Ministrave.
Dredha është detyruar “të bëlbëzojë” se zgjidhja do të vijë në fundjavë, duke shmangur çdolloj përgjegjësie për katastrofën shëndetësore dhe mjedisore që u dhurohet vlonjatëve në mënyrë periodike.
