Fetah Agaraj është një nga banorët e rreth 24 familje të një pallati në zonën e Astirit, të cilët prej dy dekadash kërkojnë që investimi i jetës së tyre t’u legalizohet. Ai tregon se ndërtuesi fillimisht u tha se pallati do të plotësohej me të gjitha dokumentet e nevojshme, por pasi ndërroi jetë çështja e tyre u zvarrit institucion pas institucioni.
“Jemi ilegal, duam të bëhemi legal. Ne frikën e kemi, se ligji nuk zbatohet dhe 35 vite në këtë shtet, vetëm ligjin nuk kemi njohur,” tha Agaraj për Citizens.
Nisur nga situata e krijuar, një grup familjarësh bashkë me Agarajn, protestuan sot përpara Agjencisë Shtetërore të Kadastrës (ASHK).
Shpesh atyre u është thënë se duhet të presin pasi janë në proces, por sot ata mundën të takonin Ertis Shehun, një nga drejtuesit e Drejtorisë Vendore të Kadastrës Tiranë, i cili u premtoi se brenda dy javësh ky institucion do t’u japë zgjidhje.
Gentian Serjani, avokati i “Drejtësisë Sociale”, i cili po ndjek çështjen nga kuadri ligjor, theksoi se kur banorët bëhen bashkë ka gjithmonë zgjidhje.
“Ne e dimë që ka shumë prona në kryeqytet që janë në këtë situatë, por nuk mundet që qytetarët që kanë paguar paratë për të blerë banesën dhe kanë shpenzuar të ardhurat e jetës, të mos regjistrojnë pronën e tyre,” analizoi Serjani.
Ai shpjegon se në këtë situatë është shkelur çdo afat ligjor, pasi sipas parashikimeve, pas 90 ditëve që dorëzohet dokumentacioni i një prone të caktuar, duhet të ketë një vendim nga ana e ASHK-së për përfundimin e legalizimit, ose për përjashtimin nga ky proces.
Marie Selmani, banore, tha për Citizens se nëse nuk do të zbatohet afati i premtuar brenda datës 5 prill, si afat përfundimtar për një vendim të mundshëm legalizimi, banorët e pallatit do të rikthehen në dyert e ASHK-së për të kërkuar të drejtën e tyre.
Legalizimet mbeten një proces në gangrenë. Analizuar edhe në të shkuarën nga Citizens, procesi ka qenë prej vitesh ndër premtimet kryesore të partive në pushtet dhe duket se ende vijon të jetë i pazgjidhur për shume familje.
Sipas ASHK-së prej vitit 2006 deri në fund të vitit 2024 u dhanë rreth 265 mijë legalizime me Tiranën me numrin më të lartë ndërkohë që prej vitit 2023, procesi mund të kryhet vetëm online.
Qeveria e ka argumentuar këtë me qëllim shmangien e korrupsionit apo burokracisë me dorëzimin e dokumenteve fizikisht. Ky faktor ka ndikuar edhe në vështirësi më të mëdha për qytetarët e moshë së tretë.
/Citizens
