Ish-lojtari i madh i Juventusit dhe Napolit, Ciro Ferrara, tani analist për DAZN, ka dhënë disa deklarata për “SportMediaset”, ku ka folur për disa tema të nxehta.
Thiago Motta u shkarkua nga Juventusi…
Nuk e di…, është e vështirë të flasësh për këto çështje. Rezultatet ndikojnë shumë në atmosferën e një ekipi, si te Juve, ashtu edhe te çdo skuadër tjetër. Kur një trajner shkarkohet, është gjithmonë për të ardhur keq, por ky është realiteti i futbollit.
Janë momente të vështira, por duhet bashkim. Problemi kryesor është mungesa e liderëve karizmatikë që mund të tregojnë se çfarë do të thotë të veshësh fanellën e Juventusit dhe të kuptosh përgjegjësitë e objektivat e klubit. Kur luan për Juven, e di që duhet të luftosh për të fituar.
Tudor apo Mancini për stolin e Juventusit në plan afatgjatë?
Nuk mund të zgjedh. Kam luajtur me të dy, i njoh mirë, por nuk më takon mua të vendos. Këto janë zgjedhje që sjellin përgjegjësi dhe iu takojnë drejtuesve.
Ndryshe nga vitet e fundit, ku Interi dhe Napoli dominuan, këtë sezon gara është më e hapur dhe më emocionuese. Përveç Interit, që ka skuadrën më të plotë, pavarësisht disa dëmtimeve, edhe Napoli po bën një sezon të shkëlqyer. E njoh mirë Conten, jam i sigurt që nuk do të dorëzohet deri në fund. Edhe pse kanë humbur disa pikë kohët e fundit, ata më parë bënë një seri rezultatesh të mëdha, që i mbajnë në vendin e dytë. Do të jetë një betejë deri në fund.
