Policia e Tiranës ka arrestuar një shtetas turk, i cili dyshohet se kontrabandonte flori dhe bizhuteri floriri nga Turqia për t’i shitur në Shqipëri.
Në kuadër të operacionit të koduar “Gold” është vënë në pranga shtetasi turk B. A., 39 vjeç, banues në Stamboll. Gjithashtu, është proceduar penalisht në gjendje të lirë dhe shtetasi S. B., 58 vjeç, banues në Vlorë, i cili shiste sendet me vlerë për llogari të shtetasit turk.
“Nga kontrolli në automjetin që drejtonte shtetasi turk, në rrugën “5 maji”, u gjetën 455 gramë flori dhe bizhuteri floriri, të cilat dyshohet se ishin kontrabanduar me qëllim shitjen nga shtetasi S. B.. Mallrat pa fatura blerjeje, u sekuestruan me cilësinë e provës materiale, së bashku me 35 000 euro dhe 16 200 dollarë që iu gjetën 39-vjeçarit, automjetin dhe celularin e tij.” – njoftojnë blutë e kryeqyteit.
Materialet procedurale i janë referuar Prokurorisë së Tiranës për veprime të mëtejshme.
