Policia e Shkodrës ka arrestuar një të ri, i cili lëvizte me automjet, për të shitur një armë zjarri.
Në kuadër të operacionit policor të koduar “Vendtakimi” është vënë në pranga shtetasi Mateo Ndreu, 20 vjeç, banues në fshatin Hot i Ri.
“Shërbimet e Patrullës së Përgjithshme ndërhynë për të ndaluar në lagjen “Skënderbeg”, automjetin me të cilin lëvizte shtetasi Mateo Ndreu. Nga kontrollet, u gjet në çantën e këtij shtetasi, një armë zjarri pushkë me municion luftarak, e cila posedohej pa leje, me qëllim shitjen.” – thuhet në njoftimin e Policisë, e cila ka publikuar dhe pamjet për mediat.
Materialet procedurale i janë referuar Prokurorisë së Shkodrës, për veprime të metejshme.
