Pas “krizës” që u përfol se përfshiu bashkinë e Tiranës dhe prej së cilës u aludua një “krisje” e raportit mes kryeministrit Edi Rama dhe Erion Veliajt, analisti Neritan Sejamini thotë se ky i fundit nuk ka më pushtet në këtë institucion.
Në studion e “Opinion”, Sejamini u shpreh se edhe në deklaratën sqaruese të Veliajt lidhur me vendimin për shkarkim të Anuela Ristanit, ka një “element që e nxjerr zbuluar”.
Dy nënkryetare bashkie, të dyja të zgjedhura nga Veliaj. Befas krijohet një moment, intrigë pallati do i quante Kadareja këto.
Neritan Sejamini: Zonja Ristani është më e afërt me zotin Rama dhe ka marrë urdhra nga zoti Rama. Zoti Veliaj ka tentuar që të kishte një person të besuar që të merrte prapë nën kontroll bashkinë, në mos kontroll, një farë ndikimi, të pyetej. Sot ai nuk është më as kryetar bashkie, de facto! Karriera politike mbaroi që ditën që u izolua dhe zoti Rama ftoi të gjithë shqiptarët në shesh për ta përcjellë me nderime politikisht. De jure është kryetar, çdo njeri në bashkinë e Tiranës e di që ka vetëm një shef, urdhrin që mund të japë zoti Veliaj nuk ka njeri në bashki që mund ta zbatojë! Pushteti i tij mbi stafin është 0! Dhe ky është paradoksi, se kryetari është i zgjedhur, të gjithë të tjerët janë staf.
Atij i është marrë minipushteti, ai minipushtet nuk ekziston më. Sot, kanë marrë vesh që zoti Veliaj nuk mund të dëgjohet nga askush! Dhe po ta vësh re te deklarata, ka një problem…Thotë nuk ishte dakordësuar midis stafit, pse stafi jep urdhër zotit Veliaj se kë vendos ai?! Pse stafi vendos vendimet politike të zotit Veliaj?! Ekipi drejtues është Veliaj, stafi janë këta. A mund të mblidhen vartësit dhe t’i çojnë vendimet shefit?!
