Policia e Tiranës ka arrestuar një person, i cili akuzohet se brenda një dite ka vjedhur me thyerje produktet e një lokali, automjetin e pronarit të lokalit, si dhe ka tentuar që të vjedhë në dy automjete të tjera, të cilat u ka thyer xhamat.
Në kuadër të operacionit policor të koduar “Reaction” është vënë në pranga shtetasi F.(Z.) T., 47 vjeç.
“Nga veprimet hetimore dyshohet se ky shtetas, më datë 16.03.2025, ka vjedhur me thyerje produkte të ndryshme në lokalin e shtetasit L. H. dhe automjetin e këtij shtetasi, si dhe ka tentuar të vjedhë në 2 automjete të tjera të parkuara afër këtij lokali, të cilëve iu ka thyer xhamat.” – njoftojnë blutë e kryeqytetit.
Policia ka gjetur dhe sekuestruar në cilësinë e provës materiale automjetin e vjedhur nga 47-vjeçari, teksa thotë se po vijojnë hetimet për zbardhjen e vjedhjeve të tjera që mund të ketë kryer ky shtetas.
Materialet procedurale i janë referuar Prokurorisë së Tiranës për veprime të mëtejshme.
