Wojciech Szczesny ishte tërhequr nga futbolli, por më pas ndryshoi mendje, sepse thjesht nuk mund t’i thoshte ‘jo’ Barcelonës
. Fillimisht, portieri polak mbërriti në Katalonjë për të zëvendësuar të dëmtuarin Ter Stegen, por tani duket se është përshtatur dhe qëndrim i tij edhe për sezonin e ardhshëm është gjithnjë e më i mundshëm.
Gjatë një interviste, Szczesny e lavdëroi filozofinë e lojës së blaugranave: “Luajmë futboll të mrekullueshëm, kjo është ajo që më emocionon te Barça”.
Më pas, ai theksoi ndryshimin e madh midis Juventusit dhe Barcelonës: “Te Juve fokusi kryesor ishte te rezultatet, ndërsa te Barcelona ka një gëzim ngjitës në lojë. Nuk më habit fakti që ky stil loje magjeps miliona tifozë në botë”.
Me paraqitjet e tij të shkëlqyera, polaku i ka bindur katalanasit ta mbajnë, pavarësisht se është 34 vjeç. “Nuk besoj se jam ende në formën time maksimale. Forma ime më e mirë ende nuk ka ardhur,
Me shumë mundësi, së shpejti do të vijë momenti për të marrë një vendim për të ardhmen time. Gjëja më e rëndësishme tani është t’i përqendroj të gjitha energjitë e mia fizike dhe mendore te ndeshjet e ardhshme. Duhet të luajmë në maksimum.
Nuk mund të ankohem për fatin. Duhet të jem shumë mirënjohës për mënyrën se si më ka trajtuar. Të luash për Barcelonën është diçka emocionuese, sepse luhet një futboll shumë i bukur, diçka krejt ndryshe nga ajo që kam përjetuar deri tani.”– tha ai për “Eleven Sports”.
