Policia e Tiranës ka dalë me një komunikatë të shkurtër për mediat në lidhje me sulmin me breshëri kallashnikovi të regjistruar gjatë natës në godinën e biznesit “CFO Pharma” në pronësi të Nadir Çaushollit, në zonën e Kasharit, buzë autostradës Tiranë-Durrës.
Edhe pse ngjarja dyshohet se ka ndodhur gjatë natës, rreth orës 02:00, blutë e kryeqytetit thonë se njoftimi në sallën operative të Policisë ka shkuar në orën 08:10 të mëngjesit.
Ky detaj ngre dyshime se ngjarja mund të jetë tentuar të fshihet nga vetë pronari i biznesit Nadir Çausholli. Mësohet se në fasadën prej xhami të godinës janë konstatuar rreth 20 shenja plumbash.
Duket se autorët kanë dashur t’i përcjellin një “mesazh” Nadir Çaushollit, nisur nga koha kur është sulmuar biznesni dhe duke qëlluar vetëm në pjesën e fasadës. Nga të shtënat me armë zjarri nuk raportohet për të lënduar.
Njoftimi i Policisië:
“Rreth orës 08:10, në sallën operative të DVP Tiranë, ka ardhur njoftimi se në rrugën dytësore të autostradës “Durrës – Tiranë”, gjatë natës, dyshohet se është qëlluar me armë zjarri në drejtim të fasadës së një ndërtese.
Nga të shtënat janë shkaktuar vetëm dëme materiale.
Grupi hetimor, në drejtimin e Prokurorisë, po punon për identifikimin dhe kapjen e autorit/ëve dhe për zbardhjen e rrethanave të rastit.”
Sulmohet me breshëri kallashnikovi “CFO Pharma” e Nadir Çaushollit
