Policia e Vlorës ka proceduar penalisht në gjendje të lirë gruan që mbrëmjen e të premtes (14 Mars) përplasi disa herë në trotuat foshnjës e saj 5 muajshe në lagjen “Pavarësia” të qytetit bregdetar. Nën hetim është vënë shtetasja H. L., 37 vjeçe, banuese në Tiranë.
“Specialistët për Hetimin e Krimeve në Komisariatin e Policisë Vlorë referuan materialet në Prokurori dhe nisën procedimin penal H. L., 37 vjeçe, banuese në Tiranë, pasi më datë 14.03.2025, dyshohet se ka keqtrajtuar foshnjën e saj 5 muajsh. I mituri ndodhet në kujdesin e shërbimeve të qendrës sociale në Vlorë, ndërkohë që punohet për trajtimin e mëtejshëm të rastit”, thuhet në njoftimin e policisë.
Dyshohet se në gjendje të dehur, mbrëmjen e të premtes ajo përplasi disa herë në trotuar foshnjën e saj. Qytetarët e pranishëm aty dhe forcat e Policisë ndërhyrë për t’i marrë fëmijën, por ajo i kundërshtoi me forcë.
Foshnja u dërgua në spital për kontrolle mjekësore dhe nuk kishte dëmtime të dukshme, teksa iu bë dhe një skaner për të vlerësuar gjendjen e organeve të brendshme.
Ndërkohë, nëna e fëmijës u shoqëruar në Polici pas ngjarjes për t’u marrë në pyetje. Burime bëjnë me dije se ajo është e divorcuar.
