Që prej 1 Korrikut të vitit 1996, Erion Braçe është deputet i Kuvendit të Shqipërisë nën logon e PS-së dhe pas 29 vitesh ligjvënës, e sheh veten të rrezikuar për ta parë veten jashtë parlamentit.
Fillimisht ishte Belinda Balluku, ajo e cila si drejtuese politike e PS-së në Fier e “zboi” nga zona e tij e Divjakës, për të vendosur njerëzit e saj dhe pasi Edi Rama e transferoi tek njësia 5 në Tiranë, sërish e la në listë të hapur, ku i duhet të luftojë për vota persona për tu futur në Kuvend.
E rrezikun se do i “zhvishet” kostumi i deputetit, po e ndjen edhe vetë Braçe, pasi prej shpalljes së listave po bën postime në rrjet dhe po mban fjalime lamtumire.
Gjithsesi, ditën e djeshme, Braçe ka bërë një postim në rrjetet sociale, ku konfirmon nisjen e betejës kundër socialistëve të tjerë në Tiranë, ku nuk lë pa “goditur” me mesazhe indirekte as “shokët dhe shoqet” e partisë.
“DO E BËJ KËTË BETEJË EDHE KËTË HERË; DO MARR VOTA ME FYTYRË, KURRË PA FYTYRE!
Nuk kam ministri, ndërmarrje, asete, nëpunës, të mira publike për të shpërndarë-I KA NDALUAR LIGJI KËTO;
Nuk kam biznes, para, llogari bankare nga rrjedhin para zgjedhore;
Nuk kam biznesmenë, as përpara e as mbrapa, detyrim ndaj tyre;
Nuk kam televizion, gazetë, portal, podcast;” – shkruan Braçe në postimin e tij.
Më tej, Braçe konfirmon se ka kaluar një javë të vështirë, ku sipas tij, i është dashur të përtypë inatin brutal përjashtues “o unë, o ai”. Braçe e konsideron si një betejë të pabarabartë, ku i duhet të luftojë për vota personale në një zonë ku ka vetëm 6 javë.
“Kjo javë ka qenë e vështirë. Më është dashur të përtyp përfundimisht inatin brutal përjashtues “o unë, o ai”, të pranoj një garë të pabarabartë kur kam veç 6 javë këtu, të shkel mbi ca parime që i kam të shenjta kur më duhet të konkuroj në një strategji jo etike me shokët e mi të vjetër e të rinj.” – shkruan Braçe.
