Liridona Beqiri, juriste në Maqedoninë e Veriut, në një lidhje direkte me “Off the Record” me Andrea Dangllin në A2 CNN, deklaroi se tragjedia në diskotekën në Koçan është dëshmi e kalbëzimit të institucioneve shtetërore.
“Tragjeditë që po i ndodhin Maqedonisë së Veriut janë aksidente që shpalosin një realitet shumë të rëndë për sistemin e sigurisë dhe menaxhimin e emergjencave në vend. Këto humbje jete që mund të parandaloheshin, janë testamenti përfundimtar i kalbëzimit brenda institucioneve tona. Është thirrje zgjimi, për tu ngritur dhe për të kërkuar llogaridhënie, për të garantuar që asnjë familje mos të dëmtohet nga indiferenca e atyre që janë në pushtet. Kjo është tradhti e vetë themelit mbi të cilin qëndron shoqëria jonë. Sistemi i drejtësisë duhet çmontuar dhe rindërtuar nga e para. Kemi të bëjmë me korrupsion sistematik që minon drejtësinë”, tha gazetarja Liridona Beqiri.
“Nuk është e hijshme vetëm që të gjejmë fajtorët, por është përgjegjësi e jona si shoqëri. Është tragjedi që ka lindur prej shumë vitesh nga dështimet institucionale dhe mosfunksionimi i qeverive. Klubi ku ka rënë zjarri duhej t’i nënshtrohej kontrolleve dhe protokollet e sigurisë nuk janë zbatuar. Qeveria, organet rregullatore kanë dështuar. Nuk është vetëm një incident i izoluar”, shtoi gazetarja.
