Ekspertët e Kombeve të Bashkuara kanë akuzuar Izraelin se po përdor gjithnjë e më shumë dhunë seksuale me bazë gjinore kundër palestinezëve dhe se po kryen “akte gjenocidale” përmes shkatërrimit sistematik të objekteve të kujdesit shëndetësor për nënën dhe riprodhimin.
Një raport i porositur nga Këshilli i OKB-së për të Drejtat e Njeriut dokumenton shkeljet, duke përfshirë përdhunime në Gaza dhe Bregun Perëndimor të pushtuar që nga sulmi i Hamasit në 7 tetor 2023 ndaj Izraelit që shkaktoi luftën në Gaza.
Ai gjithashtu thotë se shkatërrimi i materniteteve në Gaza dhe i embrioneve në një klinikë fertiliteti mund të tregojë një strategji për të parandaluar lindjet midis një grupi të caktuar – një nga përkufizimet ligjore të gjenocidit.
Izraeli nga ana tjetër ka reaguar duke u shprehur se “i hedh poshtë kategorikisht akuzat e pabaza”.
Kryeministri izraelit Benjamin Netanyahu u përgjigj me zemërim, duke e quajtur Këshillin e të Drejtave të Njeriut “një organ antisemitik, i kalbur, që mbështet terroristët dhe i parëndësishëm”.
“Në vend që të fokusohej në krimet e luftës të kryera nga Hamasi po sulmon Izraelin me akuza të rreme”, tha ai.
Komisioni i Pavarur Ndërkombëtar i Hetimit mbi Territorin e Pushtuar Palestinez u krijua nga Këshilli i OKB-së për të Drejtat e Njeriut në vitin 2021 për të hetuar të gjitha shkeljet e supozuara të ligjit ndërkombëtar humanitar dhe të të drejtave të njeriut.
Komisioni prej tre anëtarësh tha se raporti i tij i ri bazohej në dëshmitë e viktimave dhe dëshmitarëve të dhunës seksuale, disa prej të cilëve folën gjatë dy ditëve të seancave dëgjimore publike të mbajtura në Gjenevë në fillim të kësaj jave, si dhe fotografitë e verifikuara dhe pamjet video, dhe informacione nga shoqëria civile dhe organizatat për të drejtat e grave.
Raporti thotë se forma specifike të dhunës seksuale dhe me bazë gjinore – të tilla si zhveshja e detyruar publike dhe lakuriqësia, ngacmimet seksuale duke përfshirë kërcënimet për përdhunim, si dhe sulmet seksuale përbëjnë pjesë të procedurave standarde operative të Forcave të Sigurisë izraelite ndaj palestinezëve.
“Forma të tjera të një dhune të tillë, duke përfshirë përdhunimin dhe dhunën në organet gjenitale, u kryen ose nën urdhra të qartë ose me inkurajim të nënkuptuar nga lidershipi më i lartë civil dhe ushtarak i Izraelit”, thuhet në raport.
Raporti nuk ofron shembuj të urdhrave të qarta nga komandantët apo zyrtarët e lartë, por ai citon deklarata nga ministrat izraelitë që mbrojtën ushtarët që u akuzuan për keqtrajtim të rëndë të një të burgosuri palestinez në bazën ushtarake Sde Teiman vitin e kaluar .
Izraeli ka hedhur poshtë akuzat për keqtrajtim dhe torturë të përhapur të të burgosurve të Gazës dhe këmbënguli se është plotësisht i përkushtuar ndaj standardeve ligjore ndërkombëtare.
Raporti thotë se komisioni zbuloi gjithashtu se forcat izraelite kishin shkatërruar sistematikisht objektet e kujdesit shëndetësor seksual dhe riprodhues në të gjithë Gazën gjatë luftës 17-mujore atje.
Ai arrin në përfundimin se gratë dhe vajzat kanë vdekur nga komplikimet që lidhen me shtatzëninë dhe lindjen e fëmijëve për shkak të kushteve të vendosura nga autoritetet izraelite të cilat kanë mohuar aksesin në kujdesin shëndetësor riprodhues dhe thotë se ato përbëjnë krim kundër njerëzimit të shfarosjes.
Komisioni gjithashtu pretendon se autoritetet izraelite kanë shkatërruar pjesërisht kapacitetin riprodhues të palestinezëve në Gaza si grup përmes shkatërrimit sistematik të objekteve të kujdesit shëndetësor seksual dhe riprodhues, duke përfshirë spitalet e maternitetit dhe maternitetet e spitaleve dhe klinikën kryesore të fertilitetit in vitro të Gazës, Al-Basma IV CityF.
“Kjo përbën dy kategori aktesh gjenocidale në Statutin e Romës dhe Konventën e Gjenocidit, duke përfshirë shkaktimin e qëllimshëm të kushteve të jetës të llogaritura për të sjellë shkatërrimin fizik të palestinezëve dhe vendosjen e masave që synojnë parandalimin e lindjeve”, thuhet në raport.
Sipas raportit, laboratori i embriologjisë në Al-Basma u godit në fillim të dhjetorit 2023, duke shkatërruar rreth 4,000 embrione, si dhe 1,000 mostra spermatozoidësh dhe vezë të pafertilizuara.
Ai thotë se komisioni përmes analizës vizuale të fotografive përcaktoi se dëmi ishte shkaktuar nga një predhë e kalibrit të madh, me shumë mundësi një predhë tanku izraelit, dhe se ishte sulmuar qëllimisht nga forcat izraelite.
