Një 40-vjeçar është vënë në pranga në Portin e Durrësit.
Arrestimi i tij mësohet se ka ardhur pasi ai ka tentuar të fusë në vendin tonë mbi 100 mijë euro të padeklaruara. Policia bën me dije se këto para dyshohen se janë produkt i veprimtarive kriminale.
I arrestuari është identifikuar si Jahje Zebi, të cilit iu gjetën paratë në furgonin që po drejtonte. Gjatë kontrolli në furgonin e 40-vjeçarit u gjetën 108 960 euro dhe 600 franga.
“Shërbimet e Policisë Kufitare të portit të Durrësit, si rezultat i intensifikimit të kontrolleve dhe verifikimeve të imtësishme në hyrje/dalje të Shqipërisë, me objektiva parandalimin dhe goditjen e krimeve ne kufi, në bashkëpunim me autoritetet doganore, finalizuan fazën e dytë të operacionit policor të koduar “Aseti”.
Gjatë operacionit u arrestua në flagrancë shtetasi Jahje Zebi, 40 vjeç, banues në Dibër. Gjatë kontrollit në vijën e dytë, në furgonin që drejtonte ky shtetas, u gjetën 108 960 euro dhe 600 franga, që tentonte t’i fuste në Shqipëri, pa i deklaruar në pkk”, njofton policia.
Së bashku me paratë, u sekuestruan në cilësinë e provës materiale, furgoni që drejtonte i arrestuari, si dhe 2 celularë dhe pasaporta e tij.
Në bashkëpunim me Prokurorinë dhe me partnerët, vijon puna për të dokumentuar burimin e parave të sekuestruara. Materialet procedurale i kaluan Prokurorisë së Durrësit, për veprime të mëtejshme.
