Presidenti i Partisë së Lirisë, Ilir Meta do të garojë në listën e hapur të opozitës në Tiranë.
Kryesia e Partisë së Lirisë njoftoi mbrëmjen e sotme se ka miratur vendimin e Presidentit të Partisë së Lirisë, Ilir Meta për të qenë kandidat për deputet në listën e hapur.
‘Kryesia e Partisë së Lirisë miratoi sonte vendimin e Presidentit të Partisë së Lirisë, Z. Ilir Meta për të qenë kandidat për deputet në listën e hapur, Qarku Tiranë, të koalicionit “Partia Demokratike-Aleanca për Shqipërinë Madhështore”, në zgjedhjet për Kuvend të datës 11 Maj 2025’, thuhet në njoftimin e PL.
Kujtojmë se Sali Berisha, i cili udhëheq koalicionin, në një prononcim për media, kishte deklaruar se Meta do të ishte në listën e sigurt në Fier, ndërsa në Tiranë të spostohej Tedi Blushi dhe Erisa Xhixho në listën e sigurt. Por siç duket, kjo kërkesë e liderit demokrat është refuzuar nga ana e kreut të PL-së.
Ndërsa më herët, Meta, gjatë fjalës së tij për Komitetin Drejtues Kombëtar, Meta rha se “na duhet që në listat e hapura të përzgjedhim kandidatë sa më përbashkues dhe përfaqësues.”
Meta gjithashtu tha se është shumë e rëndësishme që koalicioni të marrë sa më shumë mandate, “pasi kjo na ndihmon edhe ne, por edhe partitë e tjera aleate për të fituar më shumë mandate në listat e hapura”
“Për ne është vendimtare fitorja e koalicionit, i cili është më i gjeri dhe më përfaqësuesi”, theksoi ai.
