Policia franceze ka goditur bandën e pagëzuar “Nikla”, e cila drejtohej nga i arrestuari Edison Pula.
Në pranga sipas autoriteteve franceze kanë rënë shtatë shqiptarë të përfshirë në këtë bandë që merrej kryesisht me grabitje në Paris por edhe për shpërndarjen e lëndëve narkotike. Ndërsa 5 persona të tjerë, burra dhe gra të kombësisë shqiptare, u arrestuan nga policia të martën më 4 mars 2025 në zonën e Reims.
Pre e këtyre grabitjeve kanë rënë edhe vila rezidenciale të figurave publike në Francë dhe në Belgjikë, por edhe futbolliste te njohur, këngëtarë, pilotë të Formula Uno etj… Adresat e tyre i gjenin ne rrjetet sociale.
Sipas autoriteteve franceze bosi i kësaj bande e quajtur “Nikla” është 30-vjeçari shqiptar, Edison Pula, i cili u arrestua në Luksenburg në fund te janarit të vitit 2025 për llogari te Francës. Ai u identifikua falë profilit të tij gjenetik, i marrë nga më shumë se 30 vjedhje të kryera midis qershorit 2022 dhe shtatorit 2024.
Edison Pula, kërkohet edhe nga Shqipëria me njoftim të kuq në Interpol për vrasje të mbetur ne tentativ. Në Shqipëri Edison Pula u dyshua bashkë me 8 persona të tjerë, si pjesë e një grupi që me 19 shtator të 2016 i vunë eksploziv automjetit të ish-policit të burgjeve Gentian Bejtja, i cili mbeti i plagosur rëndë.
Para kësaj, ai ishte arratisur disa herë nga burgjet, së fundmi nga Treviso, Itali, në qershor 2022. Më pas lidhi çarçafët për t’u arratisur nga dritarja. Më pas u strehua në Francë ku vazhdoi të kryente krime.
