Juventus ka pësuar humbje me rezultat të thellë 4-0 në shtëpi ndaj Atalantës në kuadër të javës së 28-të në elitën e futbollit italian.
Golin e avantazhit miqtë e shënuan në minutën e ’29-të përmes Mateo Reteguit i cili ishte i saktë nga pika e bardhë e penalltisë për rezultatin 1-0. Në sekondat e fundit të pjesës së parë, Ademola Lookman pati dy raste të njëpasnjëshme ku tek njëra goditi shtyllën, ndërsa tek tjetra u ndal nga portieri vendas Di Gregorio.
Me të filluar pjesa e dytë, të besuarit e Gian Piero Gasperinit gjetën golin e dytë përmes Marten De Roon, i cili në minutën e 46-të realizoi për 2-0.
Atalanta nuk u ndal me kaq dhe në minutën e 66-të pas një super aksioni, gjete rrjetën edhe një herë tjetër përmes Davide Zappacostas i cili realizoi për 3-0. Goditjen përfundimtare ‘Zonjës së Vjetër’ ia dha Ademola Lookman (77’) i cili shfrytëzoi një pasim të gabuar nga Dusan Vlahoviç për të shënuar për rezultatin përfundimtar 4-0.
Kapiteni i kombëtares shqiptare Berat Gjimshiti luajti për gjatë gjithë lojës, ku pati një paraqitje të mirë përballë sulmit juventin.
Pas kësaj humbje, Juventus mbetet në kuotën e 52 pikëve dhe momentalisht renditet në pozicionin e katërt, të cilën mund ta humbasë nëse Lazio nesër (e hënë) triumfon ndaj Udineses.
