NgaBoldnews.al
Menaxheri i klubit të futbollit “Delvina” (i njohur prej dekadash si “Bistrica”), Markelian Alinani, është arrestuar të martën e kësaj jave (4 mars 2025), me urdhër të Prokurorisë së Gjirokastrës, si i përfshirë në një grup të strukturuar kriminale që kishte aktivitet në trafikimin e lëndëve narkotike.
Ai edhe bashkëpunëtorët e tij, janë hetuar fillimisht nga Prokuroria e Posaçme (SPAK), e cila më pas e kaloi rastin për ndjekje nga prokuroria e qytetit jugor.
Alinani duket se është një person i preferuar nga kryetari i Bashkisë së Delvinës, Besmir Veli, i cili, pavarësisht precedentëve të mëparshëm penal të ish-futbollistit, i ka besuar drejtimin e skuadrës së futbollit të qytetit.
Klubi i Futbollit “Delvina” është një shoqëri aksionere, në pronësi 100 përqind të Bashkisë së Delvinës, e drejtuar nga Veli. Kjo do të thotë që kryebashkiaku, si pronari i skuadrës, është edhe personi që vendos për drejtimin e klubit sportive.
Dhe, pikërisht, në drejtimin e “FK Delvina”, kryetari i Bashkisë ka aprovuar emrin e Markelian Alinanit, megjithëse emri i këtij të fundit është përmendur shpesh në kronikën e zezë. Banorë të zonës, të kontaktuar nga “Boldnews.al” tregojnë se trajneri Alinani ka raporte të mira me kryetarin e bashkisë, Besmir Veli, por, sidomos me disa familjarë të afërt të këtij të fundit.
Besmir Veli u zgjodh kryetar i Bashkisë së Delvinës në zgjedhjet lokale të vitit 2023, si kandidat i Partisë Socialiste të kryeministrit Edi Rama.
Arrestimi “i radhës” i Alinanit
Në orët e para të mëngjesit të 4 Marsit 2025, Policia e Shtetit zhvilloi një operacion anti-droge në Sarandë dhe Delvinë.
Burime për mediat bëjnë me dije se janë lëshuar gjithsej 10 masa sigurie për një grup kriminal droge në Sarandë, por deri më tani raportohet vetëm për 3 persona të arrestuar.
Mësohet se forcat policore kanë kryer kontrolle në disa banesa, si dhe janë sekuestruar disa celularë që dyshohet se përdoreshin për aktivitetin kriminal.
Mësohet se janë shoqëruar 3 persona në Sarandë, si dhe 9 persona në Delvinë.
Në Sarandë është ndaluar Bledar Haderi, me precedentë penale, me masë sigurimi “Arrest në burg”, Gelbert Koshi me masë sigurimi “Arrest në shtëpi” dhe Dhurim Logli me masë sigurimi “Detyrim për t’u paraqitur në policinë gjyqësore”.
Ndërsa dy prej të ndaluarve në Delvinë janë Markelian Alinani, trajner i ekipit “Bistrica”, si edhe Orges Kalo.
Procedimi penal për këtë grup kriminal është regjistruar nga SPAK që në vitin 2020, por më pas i ka kaluar Prokurorisë së Gjirokastrës, pasi Prokuroria e Posaçme kishte shpallur mos kompetencë.
Precedentët e trajnerit Alinani
Markelian Alinani, dikur futbollist i skuadrës së Bistricës në Delvinë, është përmendur disa herë në kronikën policore.
Në vitin 2012, kur ai ishte rreth 35 vjeç, është arrestuar, si pjesë e një grupi që po trafikonte lëndë narkotike kanabis nga Lazarati, drejt Sarandës.
Ky episod përmendet kështu në kronikën e kohës.
“Operacioni i specialistëve të Sektorit Kundër Narkotikëve në Drejtorinë e Policisë së Qarkut Gjirokastër u krye mbrëmë 12.04.2012, rreth orës 20.30 pas një informacion në rrugë operative se mbi fshatin Lazarat në malin e Sopotit disa shtetas po transportonin me kafshë dore, mushka, një sasi të madhe lënde narkotike me destinacion përfundimtar Greqinë.
Shtetasit që transportonin lëndën narkotike , ishin ndarë në grupe , me qëllim që të kontrollonin rrugët dhe të lajmëronin njëri – tjetrin për çdo problem që mund t’u dilte gjatë transportit. Porsa kanë parë policinë që po lëviste në drejtim të malit të Sopotit kanë marrë çantat me krah dhe kanë vijuar lëvizjen me shpejtësi për në drejtim të fshatit Rusan të rrethit Delvinë.
Policia arrestoi në flagrancë Markelian Alinani, 35 vjeç, Artur Shukulli 38 vjec dhe Indrit Alinani, 22 vjec, të tre nga Delvina. Gjithashtu janë shpallur në kërkim edhe 6 shtetas të tjerë , nga këta dy shtetas nga fshati Lazarat dhe 4 shtetas nga fshati Rusan i rrethit Delvinë”.
Në gusht të vitit 2014, Alinani ishte subjekt i dhunës së ushtruar nga një tjetër person me precedent penal, Artur Goro. Në kronikën policore të kohës thuhej se “janë konfliktuar dy persona me precedent penalë dhe u plagos rëndë shtetasi Markelian Alinani…”. Motivet e këtij konflikti nuk u sqaruan zyrtarisht në atë kohë, por media ngriti dyshime se përplasja mes tyre mund të ketë qenë për ndarje në veprimtari kriminale.
Në vitin 2021, Markelian Alinani u arrestua sërish me urdhër të Prokurorisë së Posaçme, kësaj radhe nën dyshimet se ishte përfshirë në veprën penale të “paracaktimit të ndeshjeve sportive”.
Emri i Alinanit u shfaq gjatë një hetimi të SPAK-ut për ish-prokurorin e Sarandës, Sali Hasa.
Në dosjen hetimore thuhej se “…Nga përmbajtja e komunikimeve evidentohet marrëveshja e lidhur më parë mes Markelian Alinanit dhe arbitrit Qerim Ruçi, që ky i fundit të bënte të mundur që fitues i ndeshjes së futbollit Selenica-Përmeti të ishte ekipi i Përmetit, me trajner Bledar Hajredini”.
Megjithëse me këto lloj precedentësh, Markelian Alinani vijonte të kishte besimin e kryebashkiakut të Delvinës, Besmir Veli, për të drejtuar klubin e futbollit të “Bistricës”.
