Probleme në horizont për ish-trajnerin e Milanit, Paulo Fonseca. Episodi që çoi në përjashtimin e tij me karton të kuq në fundin e ndeshjes mes Lyon-it dhe Brest-it – e përfunduar me fitore për skuadrën e tij – nuk ka kaluar pa u vënë re nga klubi, për ta thënë butë.
Përveç një pezullimi të mundshëm të rëndë, për të cilin në Francë flitet se mund të arrijë deri në 7 muaj, portugezi mund të përballet edhe me një ndëshkim nga vetë klubi.
Drejtori i përgjithshëm i Olympique Lyonnais, Laurent Prud’homme, konfirmoi për L’Équipe:
“Në Lyon, kur ka probleme të sjelljes, qofshin ato nga një lojtar, një anëtar i stafit, një trajner apo edhe unë vetë, ka sanksione të parashikuara, natyrisht.”
Ndëshkimi i tij ende nuk është përcaktuar saktësisht:
Një gjobë financiare? Është një çështje e brendshme, ndoshta do të flasim për të më vonë. Sigurisht që nuk jemi krenarë për atë që ndodhi dje. Ai vetë e ka pranuar dhe më gëzon fakti që menjëherë kërkoi falje. Ishte një shpërthim nervash që nuk duhet të përsëritet, kjo është e qartë, por ai i kërkoi falje arbitrit dhe u shkroi edhe zyrtarëve Delerue dhe Gauthier pa ia kërkuar askush. Kjo është për t’u respektuar. Jemi të gjithë të tronditur, por besoj se edhe ai vetë është. Tani presim vendimin e komisionit disiplinor dhe do ta pranojmë atë. Kemi ndjesinë se ka shumë tension rreth gjykimit. Klubi ka marrë një qëndrim të qartë në lidhje me Paulo Fonseca dhe është e rëndësishme ta theksojmë këtë. Do t’i kushtojmë shumë vëmendje këtij aspekti.”
