Jeta e Clifford Bull ndryshoi në moshën 15-vjeçare, kur legjendari Matt Busby, i cili drejtoi Manchester United nga viti 1945 deri në 1971, e rekrutoi për të përfaqësuar “Djajtë e Kuq” në tetor të vitit 1957.
I riu, që luante si anësor, do të qëndronte vetëm dy sezone në ‘Old Trafford’, përpara se të transferohej te Nottingham Forest, ku u përball me probleme fizike që çuan në përfundimin e parakohshëm të karrierës së tij.
Pavarësisht periudhës së shkurtër te Manchester United, Cliff Bull ishte pjesë e klubit në kohën e tragjedisë ajrore të Mynihut më 6 shkurt 1958, e cila u mori jetën 20 personave, përfshirë tetë lojtarë dhe tre anëtarë të stafit të “Djajve të Kuq”.
Ish-anësori nuk ndodhej në bordin e avionit që ndaloi në Gjermani për t’u furnizuar me karburant pas barazimit 3-3 kundër Crvena Zvezdës në Beograd, por që nuk arriti të kthehej më në Angli.
Pas 26 operacioneve, Cliff Bull vendosi t’i varte këpucët dhe nisi të punonte si hidraulik. Më shumë se pesëdhjetë vjet më vonë, ish-lojtari u bë sërish lajm për shkak se fitoi një çmim në “People’s Postcode Lottery” me vlerë mbi 450 mijë euro.
Ish-futbollisti fitoi një pjesë të një shume totale prej më shumë se tre milionë eurosh nga një llotari, biletat e së cilës shiten përmes një abonimi mujor. Vlera e çmimit përcaktohet në bazë të kodit postar të vendbanimit të fituesit.
“Nuk kam fjalë. Më ka hapur kaq shumë mundësi. Jam i mbingarkuar nga emocionet. Është shumë më tepër nga sa mund ta kisha imagjinuar. Tani mund të paguaj një pushim për të gjithë familjen,” – tha ish-lojtari, i dukshëm i emocionuar, përpara se t’ia dedikonte çmimin bashkëshortes së tij të ndjerë.
