Dhuna në familje vijon të mbetet një shqetësim serioz në Shqipëri, me një rritje të rasteve të referuara në Prokurori.
Të dhënat zyrtare tregojnë se në vitin 2024 janë referuar 2139 raste, 228 më shumë se në 2023-in.
Ekspertët vlerësojnë se kjo situatë lidhet edhe me një ndërgjegjësim më të madh për denoncimin e dhunës.
“Padiskutim është e dukshme, që nga një vit në tjetrin, numri i vajzave dhe grave që vijnë për të marrë shërbime është gjithmonë e në rritje”, tha Iris Luarasi, Linja e Këshillimit për Vajza dhe Gra, 116 117.
“Vetë vajzat dhe gratë janë të ndërgjegjshme për mostolerimin e dhunës, i kanë më të lehta mekanizmat për aksesueshmërinë e institucioneve”, tha Eris Dhamo, sociologe.
Dhuna prek të gjitha grupmoshat, por ka një mbizotëruese.
“Moshat nga 28-45 vjeç janë kryesisht ato që përjetojnë më shumë dhunë”, tha Luarasi.
Përveç faktorëve ekonomikë, socialë dhe psikologjikë, teknologjia po bëhet një element tjetër që ndikon në përhapjen e dhunës.
“Ne ende nuk jemi aq të ndërgjegjshëm saqë të kuptojmë ndikimin dhe efektin negative psikologjik që ka, duke na çuar në frustrim, që më pas çojnë në pamundësi të ekuilibrave të nevojshëm”, tha Dhamo.
Edukimi shihet si ndër mekanizmat më të rëndësishëm për parandalimin e dhunës.
“Unë besoj shumë tek edukimi, edukimi i fëmijëve që në moshë të hershme që dhuna nuk duhet pranuar dhe është krim”, tha Luarasi.
“Duhet të nisi nga masat edukative, politikat i kemi të mira, por duhet të rrisim gamën e shërbimeve dhe të jenë lehtësisht të aksesueshme”, tha Dhamo.
Një tjetër tregues i rëndësishëm është edhe rritja e numrit të urdhrave të mbrojtjes për viktimat e dhunës në familje./Tv Klan
