Elbasani mposhti Partizanin me rezultatin 2-0 në ndeshjen e sotme për javën e 27-të të Superiores. Trajneri i Partizanit, Arbër Abilaliaj doli në prononcim për mediat pas kësaj humbjeje.
Ai tha se këtë takim e vendosën episodet, ndërsa për sa i përket gjykimit të ndeshjes deklaroi se arbitri nuk ishte në lartësinë e duhur.
“Pjesa e parë që me dy tre episode vendosën rjedhën e ndeshjes. Kartoni i verdhë për Prekën pa bërë asgjë, Elbasani nuk kishte ardhur asnjëherë në portën tonë deri në momentin e penalltisë. Arbitri nuk ishte në lartësinë e kësaj ndeshjeje duke e parë për nga rëndësia. Ishte një ndeshje e rëndësishme, luajmë sërish për tre ditë, duhet të analizojmë gabimet tona.
Të shikojmë dhe pjesën që nuk bëmë mirë, ajo që ndodhi në pjesën e parë indicoi dhe gjithë zhvillimin e pjesës së dytë. Mendoj se edhe zëvendësimet i bëmë për të mbajtur intensitetin e pjesës së parë. Me kartonin e dytë të verdhë të Mehmetit bëri që çdo gjë të percipitonte.
Forcat ishin të barabarta në fushë edhe në fund patëm shanc të barazonim, por nuk kishim shumë fat. Nuk e kuptova pjesën e faullit të parë të Mehmetit, as kartonin e dytë të verdhë. Nëqoftë se Elbasani nuk do të kishte asnjë penallti, nuk mendoj se do kishte shanse të ishte në portën tonë.
Edhe pse kemi pësuar gola nga goditje dënimi dhe penallti, është e vështirë të shënosh ndaj kësaj mbrojtjeje. 3-4 individë nuk ishin në lartësinë e kësaj ndeshjeje.”, u shpreh Abilaliaj.
