Bologna ka fituar 2-1 ndaj Milan-it në “Renato Dall’Ara”, në ndeshjen e prapambetur në Serie A, e shtyrë për shkak të motit të keq.
Ishte Rafael Leao që zhbllokoi shifrat në minutën e 43-të, pas një topi të gjatë të marrë nga portieri francez Mike Maignan dhe i ndihmuar nga Santiago Gimenez, sulmuesi portugez iu shpëton bukur mbrojtësve kundërshtarë dhe dërgon topin në rrjetë.
Pjesa e parë u mbyll me shifrat 0-1. Pjesa e dytë nisi direkt me gol, ku vendasit barazuan shifrat në minutën e 48-të me yllin e tyre, Santiago Castro-n.
Argjentinasi përfitoi nga një top i ardhur nga goditja e dënimit dhe mungesa e përqëndrimit të mbrojtjes së Milan-it, duke dërguar topin në rrjetë. Kuqezinjtë pretenduan për prekje të topit me dorë nga Giovanni Fabbian, por arbitri nuk e mori fare në konsideratë këtë gjë dhe e quajti të rregullt golin e Castro-s.
Në minutën e 82-të erdhi përmbysja e madhe e Bologna-s. Vendasit shënuan me Dan Ndoye, pas super asistit të Cambiaghi. Rezultati mbeti i pandryshuar deri në fund, Bologna merr kështu një fitore shumë të rëndësishme që do i mbajë në garë për një vend për në kupat e Europës për sezonin e ri.
Ekipi i drejtuar nga Vincenzo Italiano renditet në vendin e gjashtë me 44 pikë, ndërsa Milan në vendin e tetë me 41 pikë. Me këtë humbje, Milan ka shuar përfundimisht shpresat për një vend në Champions League për sezonin e ardhshëm.
