Te Liverpool janë të vetëdijshëm se mbajtja e Mohamed Salah përtej verës së ardhshme do të jetë një detyrë e vështirë. Kontrata e egjiptianit skadon në qershor të vitit 2025 dhe, deri më tani, nuk ka pasur ndonjë përparim të rëndësishëm për një rinovim të mundshëm.
Duke qenë se për sulmuesin ka disa oferta joshëse nga klubet arabe, drejtuesit e Liverpool kanë filluar të punojnë për të gjetur zëvendësuesin ideal të Salah.
Sipas raportimeve të fundit nga mediat angleze dhe jo vetëm, Liverpool e ka identifikuar Xavi Simons si një zëvendësues të mundshëm për Salah. Holandezi, tashmë në pronësi të RB Leipzig, pasi klubi gjerman bleu kartonin e tij nga Paris Saint-Germain, po shfaq një nivel të jashtëzakonshëm në Bundesligë, duke u konsoliduar si një nga mesfushorët sulmues më vendimtarë në kampionatin gjerman.
Aftësia e tij për të luajtur në disa pozicione sulmuese, shkathtësia në driblime dhe aftësia e tij për të krijuar raste e bëjnë atë një profil tërheqës për Arne Slot.
Ndërkohë, Leipzig e di se mbajtja e Simons do të jetë e vështirë duke parë shkëlqimin e tij dhe do të ishte i gatshëm të negocionte largimin e holandezit nëse merr një ofertë 90-100 milionë euro. Situata e Simons do të jetë një nga temat më të nxehta në merkaton e verës, pasi shkëlqimi i tij dhe rritja si lojtar kanë zgjuar interesin e shumë klubeve të mëdha, mes tyre dhe Liverpool-i.
