Kisha e Shën Todrit në fshatin Arrëz të Lushnjes është në rrezik shembjeje.
Alarmi në strukturat shtetërore është dhënë që prej vitit 2019, por deri më sot fondet për ndërhyrje nuk janë dhënë. Ndonëse kisha është monument kulture i kategorisë së parë dhe për të është folur se kanë nisur punimet, prifti që shërben këtu, hedh poshtë zërat.
Sipas At Harallamb Llupo, ndërhyrja duhet të jetë e menjëhershme, përndryshe do ta humbasim këtë objekt të ndërtuar rreth viteve 1300. Çatia është shembur pjesërisht, muret kanë rënë duke prishur edhe një pjesë të pikturave, ndërsa lagështia dhe myku po gërryejnë strukturën e mbetur në këmbë.
“Bënë projektin dhe projekti i kësaj kishe është miratuar në 3 Janar të 2020 dhe që nga ai moment efekti i pandemisë dhe tërmetit, çdo gjë ka rënë në vesh të shurdhër”, tha At Harallamb Llupo, prift i kishës Shën Todri.
Kisha ka vënë në dijeni për degradimin e këtij objekti të shpallur monument kulture i kategorisë së parë çdo institucion përgjegjës.
Besimtarët ortodoksë të zonës për shkak të problematikave që shfaq objekti i kultit, ritet fetare po i kryejnë në vende të tjera. Përpara viteve 90, ky objekt u kthye në repart ushtarak dhe fshati një vend për të internuarit.
“Juve po të shikoni, të merrni pamje nga çatia, nga muret, nga ambientet, gjithandej është drejt shkatërrimit. Ky moment me vlera kulturore, me vlera arkitekturore, mos të shkatërrohet, sepse në periudhën e dimrit, ç’bie lart hyn brenda”, tha prifti i kishës.
Instituti Kombëtar i Trashëgimisë Kulturore, sipas burimeve nga Bashkia Lushnje, po harton projektin e restaurimit të kishës, pas inspektimit në terren të specialistëve të fushës, por ende nuk ka një datë për fillimin e punimeve.
Kisha e “Shën Todrit”, i përket periudhës pas bizantine e tipit bazilikal. Ajo daton në Shekullin e XIX-të, pikturuar në vitin 1801 nga vëllezërit Çetiri./tvklan
