Gjykata e Posaçme ka rrëzuar ditën e sotme një tjetër ankimim të bashkëshortes së Erion Veliajt, Ajola Xoxës.
Ajo kishte ankimuar kontrollin e ushtruar nga oficerët e BKH-së në apartamentin 11/4 të “Sky Tower” në Tiranë, që mbrojtja e saj e konsideron si magazinë, teksa kontrollet i konsideronte si të paligjshme.
Mes kërkesave të Xoxës ishte edhe ajo për kthimin e një celularit, e cila është rrëzuar edhe më parë nga gjykata. Ndërkohë, ditën e djeshme, Apeli i Posaçëm i rrëzoi Ajola Xoxës edhe kthimin e sendeve personale, të sekuestruara nga SPAK.
Ndaj Ajola Xoxës, GJKKO ka caktuar masën “detyrim paraqitje”, teksa fillimisht iu caktu “Arrest në shtëpi”.
Ajo akuzohet nga SPAK për kryerjen e veprave penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë), “Pastrimi i produkteve të veprës penale ose veprimtarisë kriminale”, “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Nga hetimi i SPAK ka rezultuar se Erion Veliaj dhe Ajola Xoxa kanë krijuar një skemë përfitimi ryshfetesh për pasurim personal përmes një numri organizatash dhe kompanish të kontrolluara prej tyre apo të afërmve të tyre dhe kanë përfituar së paku 1.1 milionë euro në nëntë raste. Veliaj akuzohet se ka përfituar tre vila në një fshat turistik në Qerret ndërsa Xoxa akuzohet se ka shpenzuar rreth 800 mijë euro në blerje online, të cilat nuk i ka deklaruar në deklaratat vjetore.
Biznesmenët Elman Abule, Gentian Sula, Shkëlqim Fusha, Fatmir Bektashi, Meriman Palushi dhe Sokol Kryeziu në këmbim të tenderave nga Bashkia e Tiranës dhe lejeve të ndërtimit, i ofronin Erion Veliajt, shuma monetare nëpërmjet blerjeve fiktive, biletave avioni, sponsorizimeve, OJF-ve të Ajola Xoxës, si dhe pasurive të paluajtshme, si disa vila në Qerret.
