Një 33-vjeçar është arrestuar nga Policia në Dimal, pasi ka qëlluar me armë zjarri në afërsi të banesës së tij.
Sipas policisë, 33-vjeçari Leonard Tafa gjatë një konflikti me vëllanë, qëlloi me kallashnikov në ajër, në afërsi të banesës së tij.
Dyshohet se i riu ishte nën efektin e alkoolit. Ai do të akuzohet për veprat penale “Mbajtja pa leje dhe prodhimi i armëve, armëve shprëthyese dhe municionit” dhe “Prishja e qetësisë publike”.
“Menjëherë pas njoftimit nga disa shtetas, se familjari i tyre po qëllonte me armë zjarri në ajër, në afërsi të banesës, shërbimet e Stacionit të Policisë Dimal kanë organizuar punën dhe kanë shkuar në adresën e dhënë, në fshatin Goriçan.
Si rezultat i ndërhyrjes së menjëhershme dhe i veprimeve profesionale të shërbimeve të Policisë, në kuadër të operacionit “Telefonata”, u neutralizua autori, shtetasi L. T., 33 vjeç, i cili dyshohet se duke qenë në gjendje të dehur, ishte konfliktuar me vëllanë e tij, dhe më pas kishte qëlluar me kallashnikov në ajër, në afërsi të banesës. Vijojnë kërkimet për gjetjen e armës.
Në përfundim të veprimeve procedurale, 33-vjeçari u arrestua në flagrancë për veprat penale “Mbajtja pa leje dhe prodhimi i armëve, armëve shprëthyese dhe municionit” dhe “Prishja e qetësisë publike”, si dhe materialet iu referuan Prokurorisë së Beratit, për veprime të mëtejshme”, thuhet në njoftimin e policisë.
