Prokuroria e Posaçme (SPAK) ka dalë me një komunikatë zyrtare në lidhje me urdhër-arrestet e lëshuar për ngjarjen e regjistruar më 23 gusht të vitit 2024 në fshatin Rranxë të Vaut të Dejës, ku dyshohet se ka pasur shkëmbim zjarri mes Izmir Sakicës dhe Samuel Troshanit, dhe dy vëllezërve Andrea dhe Aleksandër Prendi.
Bëhet me dije se janë caktuar masat e sigurisë “arrest në burg” për Izmir Sakicën, Samuel Troshanin, Franko Leka dhe Aleksandër Prendin.
Masat u janë komunikuar vetëm Izmir Sakicës dhe Samuel Troshanit, të cilët ndodhen në burgun e Reçit, për shkak se u vetëdorëzuan muajin e kaluar, pasi ishin në kërkim për dhunimin e Vladimir Bruçit.
Ndërkohë, Franko Leka dhe Aleksandër Prendi, pavarësisht aksionit të djeshëm të RENEA-s në Shkodër, nuk janë gjetur dhe janë shpallur në kërkim.
Ndaj Izmir Sakicës, Samuel Troshanit dhe Franko Lekës janë ngritur akuzat për kryerjen e veprave penale, “Sigurimi i kushteve dhe i mjeteve materiale për të kryer vrasje“, kryer në bashkëpunim të veçantë në kuadër të grupit të strukturuar kriminal, “Mbajtja pa leje e armëve luftarake“, “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Ndërsa Aleksandër Prendi akuzohet për kryerjen e veprave penale “Vrasje me dashje“, e mbetur në tentative dhe “Mbajtje pa leje e armëve luftarake“.
Sipas SPAK, Izmir Sakica, Samuel Troshani dhe Franko Leka dhe persona të tjerë të pa identifikuar ishin nisur drejt fshatit Rranxë të njësisë administrative Bushat në Vaun e Dejës me automjete të blinduara për të vrarë Aleksandër Prendin, por janë hasur në pritë nga ky i fundit dhe ka patur përplasje me armë zjarri.
“Nga hetimet e zhvilluara rezulton se më 23.08.2024, rreth orës 17.00 të pasdites personat nën hetim Izmir Sakica, Samuel Troshani dhe Franko Leka, bashkë me persona të tjerë të paidentifikuar janë nisur të organizuar me mjete të blinduara në drejtim të fshatit Rranxë, në Njësinë Administrative Bushat, Bashkia Vau i Dejës.
Personat nën hetim kanë qenë të armatosur dhe ka dyshime të arsyeshme të bazuara në prova, se ata kanë shkuar në këtë zonë me qëllim vrasjen e personit nën hetim Aleksandër Prendin dhe familjarëve të tij, banorë të kësaj zonë.
Në kohën që ata kanë qenë duke kaluar në këtë zonë, janë qëlluar me armë zjarri nga personi nën hetim Aleksandër Prendi. Nga provat e siguruara në vendin e ngjarjes rezulton të ketë pasur shkëmbim zjarri, jo dëmtime të shëndetit të personave të përfshirë, por vetëm të mjeteve. Njëri nga mjetet me të cilën kanë lëvizur personat nën hetim, është dëmtuar si pasojë e të shtënave në vendin e ngjarjes. Ai ka rezultuar i paregjistruar, me pronësi të panjohur dhe me targa të huaja, të cilat nuk i përkojnë po të njëjtit mjet.” – thuhet në njoftimin e SPAK.
Organi i akuzës po ashtu konfirmon se me vendim të GJKKO-së është ushtruar kontroll në disa banesa dhe ambiente në qytetin e Shkodrës, të cilat dyshohen se përdoren si baza për strehimin e personave nën hetim ose si vende, ku mund të gjenden prova për vepra penale, të cilat po hetohen nga Prokuroria e Posaçme.
Burime bëjnë me dije se kontrolle janë ushtruar edhe në banesën e Safet Bajrit dhe bazat e grupit kriminal Bajri. Mësohet se Safet Bajri nk është gjendur në shtëpi për t’u shoqëruar për t’u marrë në pyetje në lidhje me ngjarjen.
Në sulmin e Rranxës, Samuel Troshani, Izmir Sakica dhe Flavio Leka kanë qenë duke udhëtuar me një automjet të blindur “Audi A8” ngjyrë e zezë me targa gjermane, e cila është gjetur e braktisur në vendin e ngjarjes. SPAK konfirmon se targat gjermane nuk i përkojnë mjetit “Audi A8”, i cili u gjet i braktisur.
Burime bëjnë me dije se të dhënat policore tregojnë se mjeti “Audi A8” i blinduar për një kohë të gjatë është përdorur rregullisht nga Eljo Hato, miku i Ervis Martinajt dhe nuk përjashtohet mundësia që brenda në “Audi”-n e blinduar që u sulmua me plumba kallashnikovi, ka qenë dhe Eljo Hato.
Ky i fundit është shpallur në kërkim nga SPAK-u, lidhur me ngjarjen e plagosjes së Taulant Pepaj në muajin shkurt 2021 në Shkodër. Hato i ka shpëtuar tre herë aksioneve të policisë dhe RENEA-s, ku herën e fundit forcat speciale i shkuan në shtëpi dhe i vranë dy qentë e banesës së tij. Tashmë kërkimet për Haton vijojnë ende por të gjitha aksionet nuk kanë sjellë ndonjë rezultat për lokalizmin e saktë dhe arrestimin e tij.
Ndërkohë, në sulmin e Rranxës është gjetur i braktisur edhe një automjet tip “BMW”, e cila po ashtu ka pasur dëmtime nga plumbat, teksa me të dyshohet se kanë lëvizur dy persona.
Ndërkohë, Aleksandër Prendi ka qenë me motor kur iu ka zënë pritë Troshanit, Sakicës, Lekajt dhe të tjerëve, duke i qëlluar me kallashnikov.
