Kryeministri i Kosovës, Albin Kurti iu është drejtuar me një mesazh qytetarëve me rastin e 17 vjetorit të Pavarësisë së vendit.
Në fjalën e tij para kabinetit qeverisës, Kurti tha se teksa Kosova feston duhet të kujtojë me krenari rrugëtimin e gjatë drejt lirisë dhe pavarësisë.
“Kushtetua jonë vërtetë është e re , por kultura jonë është e një populli të lashtë e autokton e rrënjosur thellë në historinë tonë të lavdishme. Ne sot nderojmë të gjithë ata që sakrifikuan dhe u flijuan për lirinë tonë”, tha Kurti.
Kryeministri Kurti theksoi tutje se suksesi i Kosovës është dëshmi e punës së pandalshme në përputhje me amanetin e idealin e dëshmorëve të kombit dhe në përputhje me të drejtat e popullit, dëshirat e rinisë dhe ëndrrat e fëmijëve.
“Urime e gëzuar dita e pavarësisë. Rroftë Republika jonë”, u shpreh Kurti.
Po ashtu edhe presidentja e Kosovës, Vjosa Osmani ka uruar 17-vjetorin e Pavarësisë së Kosovës.
Pas ngritjes solemne të flamurit, Osmani falënderoi të gjithë ata që dhanë jetën e sakrifikuan për një Kosovë të lirë, të pavarur dhe sovrane.
Në një prononcim për mediat ajo u shpreh se Kosova do të ecë përpara pasi nuk ka asgjë që e ndalë Kosovën e lirë, të pavarur dhe sovrane.
“Është një ditë që ne ju themi faleminderit nga zemra, një falënderim të përhershëm për të gjithë ata që sakrifikuan dhe dhanë gjithçka në mënyrë që ne sot së bashku ta festojmë këtë ditë të shenjtë e historike. Duke filluar nga arkitekti i Pavarësisë sonë, presidenti historik, dhe komandanti legjendar Adem Jashari që udhëhoqi UÇK-në, e deri tek secili qytetarë i Republikës sonë që sakrifikoi me mundë e me gjak në mënyrë që sot të gëzohet kjo ditë. Edhe një herë në emër të të gjithë qytetarëve të Kosovës, faleminderit për kontributin e dhënë, do të ecim përpara sepse nuk ka asgjë që mund ta ndalë Republikën tonë të lirë, të pavarur, sovrane, dhe të përjetshme. Urime!”, tha Osmani.
