Disnivelet ekonomike të familjeve shqiptare të cilat reflektohen edhe në mënyrën e jetesës, veshjes, shpenzimeve dhe sjelljes edhe të fëmijëve në shkolla dhe ambiente të tjera, të gërshetuara me rrjetet sociale shikohen si arsyet kryesore të bullizimit që kohët e fundit është kthyer në një fenomen mjaft të rrezikshëm jo vetëm sa i takon edukimit të brezit të ri por edhe jetës dhe shëndetit të tyre.
Sa i rrezikshëm aq edhe i tejkalueshëm është bullizimi tek adoleshentët nëse kërkohet ndihmë. Dhe këtë kush më mirë se një vajzë e bullizuar që në fillimet e saj të adoleshencës mund ta pohojë.
“A2 CNN” sjell dëshminë e saj, fillimet e bullzimit, përjetimet e deri tek ndihma, që sot e ka bërë një vajzë më të fortë, jo vetëm për veten e saj por edhe për shoqërinë.
“Starton duke më marrë foto në rrjetet e mia sociale dhe duke i shpërndarë shokët e shoqet që unë kisha besim të fortë. Komente nga më të rëndat dhe fyeset, denigruese. Unë i kam parë vetë se mi kanë dërguar dhe ishin shpërndarë masivisht. Më pas unë kalova në një gjendje shumë të rëndë, hyra në një botë shumë të errët, ku isha vetëm unë duke gjykuar veten që pse. Isha në gjendjen më të rëndë, mendoja aktin më të rëndë, të vetëdëmtimit. Në fillim nuk doja të kërkoja ndihmë, por më pas u shpreha me psikologen time. Isha shumë rebele e kokëfortë për të shprehur atë që ndjeja, por me kalimin e kohës fillova të shprehesha. Bullizmi nuk shërohet lehtë duhet një rehabilitim emocionalisht, zgjati deri në 3-4 vite. Sot e ndjej veten shumë të fortë dhe me besim të gurtë që s’mund ta thyejë askush. Ti themi jo bullzimit, të shprehemi ta bëjmë shpirtin tonë të ndihet më mirë dhe të mos lejojmë askënd që të na ulë dhe nënvlerësojë. Ne jemi të fortë!”, rrëfen adoleshentja.
Dhe për të patur rezultatet e kësaj dëshmie, punonjësit socialë tërheqin vëmendjen në dy hallka mjaft të rëndësishme në jetën e adoleshentëve, familja dhe shkolla.
“Fëmija duhet vërejtur që kur hyn në shtëpi, duhet lexuar si hedh çantën, si reagon. Ashtu siç mundohen ti veshin me rroba të bukura e telefona të shtrenjtë prindërit t’i japin interes më të madh rritjes e edukimit dhe formimit të atij fëmije. Pastaj varion shkolla”, thotë Etleva Memia specialiste e NJMDF.
Rastet në rritje të bullizimit që trajtojnë njësitë e mbrojtjes janë sa shqetësuese aq edhe shpresëdhënëse që sa më shumë të denoncohen aq më shumë do të reduktohen dhe tejkalohen pasojat e rënda tek adoleshentët.
