Policia e Durrësit ka arrestuar një person të shpallur në kërkim, teksa vijon të jetë ende në kërkim vëllai i tij.
Ata akuzohen për një ngjarje të regjistruar më 13 Gusht të vitit 2023, ku plagosën me sende të forta shtetasin me iniciale Sh. Ç. në Durrës, duke i shkaktuar dëmtime të rënda.
Në kuadër të operacionit të koduar “Brothers” është vënë në pranga shtetasi D. M., 22 vjeç, banues në Durrës, mbi të cilin rëndon akuza për veprën penale “Plagosje e rëndë me dashje”, e kryer në bashkëpunim.
“Ky shtetas ishte shpallur në kërkim pasi Gjykata e Shkallës së Parë të Juridiksionit të Përgjithshëm Durrës, me vendim të datës 16.10.2023, kishte caktuar masën e sigurisë “Arrest me burg”. Vijon puna për lokalizimin dhe kapjen e shtetasit M.M, i shpallur në kërkim”, njoftoi sot policia.
Materialet procedurale i kaluan Prokurorisë së Durrësit për veprime të mëtejshme.
