Në seancën e ditës së nesërme, Këshilli Drejtues i RTSH-së do të shkrihet nga Kuvendi.
U mësua se në seancën plenare që do të mbahet nesër në Kuvend, është futur në rend dite shkarkimi i Këshillit Drejtues të RTSH.
Siç duket edhe nga rendi i ditës i seancës plenare që do të mbahet nesër, Kuvendi pritet ta shkarkojë të gjithë anëtarët e Këshillit Drejtues të RTSH, duke nisur nga Gëzim Podgorica deri te Milena Selimi.
Në fillim të shkurtit u zhvillua në Komisionin për Edukimin dhe Mjetet e Informimit Publik, seancë dëgjimore, me anëtarët e Këshillit Drejtues të RTSH në lidhje me procedurat që janë ndjekur në përzgjedhjen e kandidaturave për drejtor të Përgjithshëm të RTSH.
Kryetari i Këshillit Drejtues, Leka Bungo, tha se në proces kishte paligjshmëri.
Kujtojmë se Kuvendi nisi presionin ndaj institucionit drejtues të operatorit të vetëm publik në vend pasi Këshilli Drejtues me shumicë votash skualifikoi nga gara për drejtor të përgjithshëm të RTSH-së 3 nga 5 kandidatët me pretendimin se nuk plotësonin kriteret për kualifikim.
Pesë kandidatë të tjerë ishin skualifikuar më parë për mangësi në dosjet e aplikimit.
Nga gara u skualifikuan kandidatët Eni Vasili, Kliton Rama dhe Ermal Hoxha, duke thirrur në dëgjesë vetëm dy kandidatë; Jetmir Shpuzën dhe Aurora Polon, kjo e fundit drejtore e komanduar e RTSH-së pas dorëheqjes së Alfred Pezës.
