Deputetja e PS-së dhe njëkohësisht kryetarja e Komisionit të Ligjeve, Klotilda Bushka ka reaguar në lidhje me vëninen nën hetim nga SPAK, për kryerjen e veprës penale të “Veprime që pengojnë zbulimin e së vërtetës”.
Në hetimet ndaj Erion Veliajt dhe Ajola Xoxës, Klotilda Bushka rezulton se i ka bërë presion dëshmimtares së SPAK, Ina Goxhaj, ish-drejtoreshë ekzekutive e qendrës BYL-A, duke i kërkuar që ajo të mashtronte në dëshminë e saj.
Në një postim në rrjetet sociale, Klotilda Bushka i del në mbrojtje Veliajt dhe Xoxës, duke sulmuar SPAK-un, teksa shtron pyetje se “ku hyn ajo aty?”, duke mohuar akuzat ndaj saj.
Ajo shton më tej se Ajola Xoxën e ka shoqe që nga fëmijëria, ndërsa Erion Veliajn shok që nga rinia, ndërsa pohon edhe se ka folur shpesh me Ajolën gjatë muajve të fundit, por sipas saj, asnjëherë për të mbuluar të vërtetën.
Klotilda Bushka gjithashtu deklaron se nuk është thirrur asnjëherë për t’u marrë në pyetje në lidhje me hetimet ndaj saj, teksa bën me dije se ditën e nesërme do të flasë para grupit parlamentar.
Reagimi i plotë:
Jam “pa fjalë” prej 24 orësh që figurokam edhe unë në listën e gjatë të emrave që ka grumbulluar SPAK-u për të lënë Tiranën pa kryetar bashkie, bazuar në dyshime të lidhura me njëra-tjetrën si në një film, për të cilat maksimumi i akuzave për Erjon Velinë dhe Ajola Xoxën, mund të ngrihej në gjendje të lirë. Por kjo është një temë tjetër.
Pyetja ime është ku hyj unë në këtë mes dhe pse duhet të më takonte sipas SPAK-ut balta që i shoqëron këto goditje të tij, për të cilat më shpejt vihen në dijeni disa gazetarë “specialë”, se sa kush përgojohet pa u pyetur fare?
A jam unë shoqe që nga fëmijëria me Ajola Xoxën?
Po, dhe s’kam për ta mohuar, as harruar kurrë.
A jam unë edhe shoqe me Erjonin?
Po, që në rininë e parë dhe jam krenare edhe për miqësinë me Erjonin dhe për gjithçka ai ka bërë për Tiranën.
A kam folur me Ajolën gjatë këtyre muajve të ferrit që ajo po kalon, duke u gjendur nën një presion të frikshëm mediatik, përveçse në një proces që për mua ka shumë pikëpyetje?
Po, kam folur dhe do flas sa herë të më kërkojë apo ta kërkoj. Por kurrë për të mbuluar të vërtetën, sepse halli s’ka qenë asnjëherë se si e vërteta që Ajola ka ndarë me mua të mbulohet. Halli ka qenë dhe sot është edhe më i madh, se si e vërteta e Ajolës të mos mbulohet.
Thënë sa më lart, kam kërkuar të dëgjohem nga grupi parlamentar. Kjo është vërtetë e tepërt dhe mezi pres të dëgjohem edhe nga ata që kanë futur edhe emrin tim në një akt-hetimi, pa më thirrur asnjëherë.
Klotilda Bushka presion dëshmitares për të gënjyer në SPAK: Nëse të duhen lekë më thuaj!
