Laçi ka fituar me rezultatin 0-2 në transfertën e Skënderbeut. Miqtë shënuan nga një gol për secilën pjesë në ndeshjen e vlefshme për javën e 24-të të Superiores.
Fillimisht ishte Bullari që shënoi me kokë, më pas Melo që vulosi takimin në limitet e kohës së rregullt. Skënderbeu luajti me një lojtar më pak nga minuta e 59-të, pasi Rashica u largua me karton të kuq pas rishikimit me VAR.
Pas 24 javës, Laçi merr vendin e gjashtë me 27 pikë. Në anën tjetër Skënderbeu mbyll renditjen me 20 pikë.
Teuta-Dinamo
Në sfidën tjetër të së njëjtës orë, Teuta dhe Dinamo kanë barazuar pa gola në stadiumin “Niko Dovana”.
Një ndeshje që la për t’u harruar nga të dyja kampet. Asnjë nga ekipet nuk rrezikoi seriozisht, duke e bërë këtë sfidë të zhvilluar në qytetin e Durrësit shumë të “vakët”, për shkak të rasteve me “pikatore”.
Me këtë barazim, Dinamo mbetet në vendin e katërt dhe shkon në kuotën e 40 pikëve. Në krahun tjetër, “Djemtë e Detit” me 24 pikë ngjiten në vendin e 8-të, duke lënë pas Tiranën, të cilët tashmë mbajnë vendin e parafundit.
