Ajola Xoxa, bashkëshortja e Erion Veliajt, ka mbërritur pak minuta më parë në aeroportin e Rinasit.
Mësohet se ajo është shoqëruar nga agjentët e BKH-së dhe një automjet të Policisë për në banesën e saj, ku do të qëndrojë nën masën e sigurisë “arrest shtëpie”.
Ajo ishte larguar nga Shqipëria në drejtim të Romës, dy ditë më parë, në kohën kur Gjykata e Posaçme po shqyrtonte masat e lëshuara nga SPAK ndaj saj dhe bashkëshortit Erion Veliaj, si dhe 6 biznesmenëve.
Kur agjentët e BKH-së nisën ekzekutimin e masave, ajo u nis drejt Tiranës. Ajola Xoxa i shpëtoi masës “Arrest me burg”, për shkak se bashkë me Veliajn janë prindër të një fëmije të mitur dhe njëri prej tyre duhet të qëndronte jashtë.
Sipas SPAK, Ajpola Xoxa dhe Erion Veliaj kishin ngritur një skemë korrupsioni për t’u pasuruar familjarisht nga fondet publike të Bashkisë së Tiranës dhe lejet e ndërtimit.
Nga hetimet ka rezultuar se Ajola Xoxa për një periudhë kohore prej rreth 4 vitesh, ka bërë blerje online të cilat konsistojnë në veshje, bizhuteri etj, në masën mbi 867 milionë lekë të vjetra.
Gjithashtu, asaj i janë bllokuar dhe llogari bankare në vlerën e mbi 869 mijë euro, si dhe i janë sekuestruar para “cash” mbi 95 mijë Euro, rreth 15 mijë dollarë dhe mbi 6 milionë Lekë të vjetra.
