Policia e Gjirokastrës në bashkëpunim me atë të Tiranës ka arrestuar një person të shpallur në kërkim dhe të dënuar për trafik të lëndëve narkotike.
Në kuadër të operacionit policor të koduar “Wanted” është vënë në pranga shtetasi O. I., 47 vjeç, banues në Gjirokastër, i cili është kapur në afërsi të zonës së “Liqenit të Thatë” në kryeqytet. Ai ka qenë pjesë e një organizate kriminale që trafikoi 8,4 tonë drogë drejt vendeve të Bashkimit Europian.
“Ky shtetas ishte shpallur në kërkim pasi Gjykata e Rrethit Gjyqësor Pogradec, me vendimin e datës 29.07.2020, e ka dënuar këtë shtetas me 6 vite e 8 muaj burgim (të cilit i ka mbetur për të vuajtur 2 vjet e 8 muaj e 4 ditë burgim), për veprën penale “Trafikimi i narkotikëve”, kryer në bashkëpunim.
Ky shtetas ka qenë pjesë e një grupi kriminal në vitin 2018 në trafikimin e lëndëve narkotike me shtetet e BE-së. Në goditjen e këtij grupi kriminal në vitet 2017-2018, janë zhvilluar 12 operacione policore kombëtare dhe ndërkombëtare konkretisht në Shqipëri, Greqi, Turqi, Maqedoni, Itali, ku janë arrestuar gjithsej 66 shtetas midis tyre të huaj dhe shqiptarë si dhe janë sekuestruar 8.4 ton lëndë narkotike Cannabis Sativa, municione luftarake, automjete, telefona, si dhe shuma të konsiderueshme parash.” – thuhet në njoftimin e Policisë
Në vijim të veprimeve, 47-vjeçari i është dorëzuar Policisë së Korçës, teksa materialet janë referuar në Prokurori për veprime të mëtejshme.
