Duke qenë se janë eliminuar nga Kupa prej Elbasanit, Teuta po vijon përgatitjet për ndeshjen e radhës në kampionat, e cila do t’i vendosë përballë Dinamon e Ilir Dajës.
Ndërsa ka nisur nga puna, trajneri Bledar Devolli ka qenë i pranishëm për të ndjekur nga afër ekipin U-21 të durrsakëve në ndeshjen e djeshme kundër Erzenit pasi në fushë kanë zbritur disa lojtarë të ekipit të parë.
Nga Vata në portë, Muço Boçi, David Gjinollari, Devit Demirçani apo Dejvid Kapllani kanë luajtur me skuadrën U-21. Madje, Boçi ka arritur të shënojë edhe një gol në barazimin kundër Erzenit.
Skuadra durrsake ka zhvilluar edhe seancën e radhës stërvitore në kuadër të duelit kundër Dinamos. Mbrojtja është sektori që po merr vëmendjen më të madhe.
Të paktën kjo u kuptua edhe dje, ndërsa trajneri kërkonte më shumë qarkullim topi, vertikalizime dhe inkursione nga lojtarët anësorë. Devolli është munduar që të mobilizojë grupin dhe hapur ka kërkuar reflektim për ndeshjet e radhës. Misioni mbetet i qartë, fitorja.
Dhe kur kampionati ka hyrë në një fazë delikate, tashmë gabimet janë thuajse të ndaluara. Gara është e hapur akoma, ndaj lojtarët janë të mobilizuar në çdo ndeshje që të arrijnë objektivin.
Ndërkohë sa i përket situatës së grupit, Jazxhi dhe Arifi janë në dyshim për duelin e ditës së hënë në “Niko Dovana”, megjithatë mbetet për tu parë gjatë javës. Ndërkohë i gatshëm do të jetë Erando Karabeci që ka shlyer pezullimin.
