Eksperti i kriminalistikës, Ervin Karamuço u shpreh se epiqendra e shqiptarëve në botën e krimit është Lindja e Mesme, Dubai. Ai theksoi në emisionin “360 Gradë” se aty bëhet një pazar i madh, madje ka dhe shqiptarë që nuk u dihet emri.
Ndërsa, avokatja Enida Bozheku zbuloi se cilët janë shtetet në Europë dhe në botë, ku shqiptarët e botës së krimit operojnë.
“Nga raportet ndërkombëtare flitet se shqiptarët janë të organizuar në grupet e tyre me shumë forma në mikroqendra, por gjithmonë kanë pikat kryesore që ata ndërlidhen dhe pikat kryesore janë Belgjikë, Francë, Itali, Gjermani, vendet e ulëta dhe Spanjë. Ndërsa, vendet ku operojnë jashtë Europe: Brazil, Kolumbi, Ekuador dhe vendi mëmë Shqipëria, që i lidh”, tha Bozheku.
“Ne njohim këtu vetëm Dubain, por ka dhe vende të tjera si Malta dhe vende që ne nuk i kemi futur asnjëherë në diskutimet tona, sepse nuk kemi ende indicie. Por që këta personazhe kanë ekspertë banke, financash, çdo gjë, IT, pra çdo gjë që del për ta është një risi se si të fitojnë më shumë. Por ne nuk i njohim, por një nga epiqendrat që ne kemi si shqiptarë është në Lindjen e Mesme, në Dubai. Por nuk i dimë këtyre personazheve, as emra, as mbiemra, madje disa prej këtyre personazheve nuk janë në kërkim as në Shqipëri, por rrinë aty për çështjet e tyre. Aty janë të lidhur dhe bëhet pazari i madh i gjësë”, u shpreh Karamuço.
