Edi Rama ka mohuar edhe një herë lajmin se Shqipëria është një prej vendeve në listë që mund të strehojë 100 mijë palestinezë të Rripit të Gazës, nëse plani i Donald Trump dhe Benjamin Netanyahu refuzohet nga Jordania, Egjipti dhe vendet e tjera të afërta.
Gjatë një bashkëbisedimi me ndjekësit në rrjetet sociale, Rama e ka konsideruar një sajesë që ka ardhur si një zë “kua…kua” nga këneta.
Gjithsesi, duhet theksuar se ishte gazetari i Kanalit 12 të Izraelit, ai i cili raportoi se Shqipëria është në bisedime me administratën Trump për të strehuar 100 mijë izraelitë.
Komentuesi: Votoni Ramën dhe do të prisni 100 mijë palestinezë?
Rama: Po pse, për çfarë arsye? Apo se kështu ka ardhur një zë kua…kua nga këneta. Jo! Është sajesë që mori rrugën, se jemi në atë kohë kur e përditshmja jonë, ku gënjeshtra bën xhiron e botës. E vërteta është pak e mërzitshme. Prirja për të besuar lezetet e gënjeshtrës është më e madhe. Rrej, rrej, rrej dhe bëj qejf.
Komentuesi: Mbete duke sharë, me komunikim banal bëhesh i neveritshëm.
Edi Rama: Po kënetë, nuk po i them askujt hajdut, drogaxhi. Po përcaktoj një fakt, siç ma kanë mësuar mësuesit e gjuhës shqipe, imzot Fan Noli, Faik Konica, Atë Gjergj Fishta. Nga ata e kam mësuar shqipen. Të sugjeroj të lexosh Fishtën, duke qenë prift nuk ja kursen dajakun e gjuhës shqipe ata që duan dajak. Por pa shkuar te akuzat, duke qelbur ajrin e përbashkët dhe duke ja nxirë shqiptarëve, kriminela, kriminela, hajduta. Kjo është këneta.
Kujtojmë se më 16 Janar, Shqipëria priti një familje të evakuuar nga Gaza duke u bërë pjesë e një operacioni ndërkombëtar humanitar pasi fëmija i tyre 1-vjeçar kishte nevojë për kujdes shëndetësor.
