Italia ka nisur ‘të shqetësohet’ nga deklaratat e Trump lidhur me kufizimet dhe ndryshimin e tarifave për mallrat europian.
Industria e dytë më e madhe në Itali, ajo e modës, ka shprehur shqetësimin e saj për tarifat e mundshme nga Trump. Moda gjeneron 5% të PBB-së së Italisë, ose 75 miliardë euro, përmes prodhimit dhe shitjes së tekstileve, veshjeve dhe këpucëve dhe ka të punësuar rreth 1.2 milionë punonjës.
Kreu i Dhomës së Modës të Italisë tha se ka bërë apel tek qeveria e vendit për të mbrojtur industrinë.
Presidenti i Dhomës Kombëtare të Modës së Italisë, Carlo Capasa, të mërkurën gjatë prezantimit të kalendarit për Javën e Modës në Milano që do të mbahet këtë muaj u shpreh: “Nëse Trump penalizon industrinë e dytë më të madhe në Itali, kjo është një deklaratë mjaft armiqësore.”
Kërcënimi i tarifave nga Presidenti i SHBA-së, Donald Trump, po krijon pasiguri në industri, ndërsa ajo po përjeton një tkurrje globale që shkurtoi shitjet globale në vitin 2024 me 5%, duke rënë në 96 miliardë euro nga 110 miliardë euro në vitin 2023, sipas shifrave të lëshuara nga dhoma e modës. Përveç tekstileve, veshjeve dhe këpucëve, shifrat përfshijnë gjithashtu bizhuteri, syze dhe produkte lëkure.
Ndërkohë që Trump ka kërcënuar se do të vendosë tarifa mbi importet evropiane në Shtetet e Bashkuara, ai nuk ka bërë të qartë planet e tij.
Italia eksportoi 4.6 miliardë euro produkte mode luksoze në Shtetet e Bashkuara gjatë 10 muajve të parë të vitit të kaluar, përfshirë veshje, këpucë, produkte lëkure, bizhuteri dhe syze. Ky është tregu i tretë pas Francës dhe Gjermanisë, me 7.6 miliardë euro dhe 4.7 miliardë euro shitje të modës luksoze italiane, përkatësisht, gjatë të njëjtës periudhë.
