Kupa e re e Botës për Klube, e cila do të mbahet këtë verë, nuk i pëlqen të gjithëve. Katër muaj para fillimit të këtij kompeticioni të ri (15 qershor-13 korrik) që do të zhvillohet në Shtetet e Bashkuara të Amerikës, disa liga evropiane nuk kanë rënë ende dakord për të rishikuar kalendarin për të lejuar lojtarët të pushojnë.
Një lloj “hakmarrjeje” ndaj FIFA-s, shpjegon për The Telegraph drejtori sportiv i Premier League, Tony Scholes, duke nënvizuar shqetësimin e tij për shëndetin e futbollistëve.
Sipas Scholes, FIFA ka organizuar një kompeticion që askush nuk do të kishte dashur ta luante dhe për këtë arsye nuk do të ndryshojë kalendarin: “Pse të ndryshojmë garën tonë kur FIFA ka imponuar një kompeticion me të cilin ne nuk jemi dakord?”, filloi ai. “Ne e kemi studiuar këtë çështje. Kjo garë na është imponuar nga FIFA… Është një element.
Por gjëja më e rëndësishme është se ne thjesht nuk mund të ndryshojmë. Në këtë moment orari është aq i ngushtë sa mund të imagjinohet. Dhe ne nuk mund të lejojmë të vonojmë fillimin e sezonit. UEFA ka shtuar ndeshjet me eliminim direkt: Manchester City do të luajë dy ndeshje të tjera në fazën e grupeve, dy ndeshje të tjera në play-off dhe gjashtë apo edhe shtatë ndeshje në Kupën e Botës për Klube.
Pra, potencialisht do të ketë 10 lojëra të tjera këtë vit. Programi është shtrirë në maksimum, ne kemi shkuar shumë larg. Ne po bëjmë gjithçka që mundemi për ta bërë programin sa më të arsyeshëm në një situatë që është jashtë kontrollit tonë dhe tepër e vështirë për t’u menaxhuar.”
