Presidenti i SHBA-ve Donald Trump ka shtyrë për një muaj vendosjen e tarifave tregtare ndaj Mesikës.
Pezullimin e tarifave të Donald Trump ndaj Meksikës për një muaj e bëri të ditur presidentja e vendit të Amerikës Qendrore, Claudia Sheinbaum, ndërsa ka paralajmëruar edhe vendosjen e trupave në kufi, shkruan BBC.
“Ne patëm një bisedë me Presidentin Trump, me respekt të madh për marrëdhëniet dhe sovranitetin tonë dhe arritëm një sërë marrëveshjesh”, shkroi presidentja meksikane në një postim në X.
Gjithashtu lajmi për pezullimin e tarifave u konfirmua edhe nga presidenti Trump përmes një postimi në Truth Social.
“Ne […] ramë dakord të ndalojmë menjëherë tarifat e parashikuara për një periudhë njëmujore gjatë së cilës do të kemi negociata të kryesuara nga Sekretari i Shtetit Marco Rubio, Sekretari i Thesarit Scott Bessent dhe Sekretari i Tregtisë Howard Lutnick, dhe të nivelit të lartë. Përfaqësues të Meksikës”, shkruan ai.
Tarifat e SHBA-së ndaj Kanadasë, Meksikës dhe Kinës, siç njoftoi Shtëpia e Bardhë dje, do të hynin në fuqi nga e marta, më 4 shkurt.
Bëhet fjalë për tarifa 25% për importet nga Kanadaja dhe Meksika dhe tarifat 10% për importet nga Kina.
Këto masa rrezikojnë nxitjen e një lufte tregtare, që mund t’i dëmtojë në mënyrë të konsiderueshme ekonomitë e shteteve të shënjestruara, por edhe të Shteteve të Bashkuara, sidomos për faktin se Kanadaja, Meksika dhe Kina janë zotuar për kundërmasa.
Në urdhrin ekzekutiv të prezantuar nga Trumpi përfshihet edhe një pikë që i lejon presidentit t’i zgjerojë tarifat, nëse një shtet vendos kundërmasa ndaj SHBA-së.
Presidentja e Meksikës, Claudia Sheinbaum, tha dje se shteti i saj do të vendosë tarifa ndaj SHBA-së, ndërsa kryeministri i Kanadasë, Justin Truedeau, ka paralajmëruar masa hakmarrëse “me shtrirje të gjerë”.
Ministria e Ekonomisë e Kinës, e ka lëshuar një deklaratë, duke thënë se Pekini do të ngre padi kundër Shteteve të Bashkuara në Organizatën Botërore të Tregtisë, dhe do të ndërmarrë kundërmasa, por pa dhënë më shumë hollësi.
